Aurtengo Hiru Binaka hornitzeko artisten bila ari dira
Irailaren 8an, 9an eta 10ean Oiartzungo Arte Egunak izango dira. Hiru Binaka jarduera egingo dute aurten ere bai, horren barruan. Parte-hartzaile bila ari dira.
![hiru binaka 2023 proposamen bila](https://oarsoaldea.hitza.eus/site/files/2023/07/52351690332_82aa976cd9_c.jpg)
Konfinamendu garaiaren ondorengo berpizkundean sortu zuten Hiru Binaka iniziatiba. Hiru bikote artistikok beste horrenbeste gunetan lan bana eskaintzen dute, eta txandakatu egiten dira.
Aurten ere errepikatuko dute. Irailaren 8an, 9an eta 10ean egingo dituzte Oiartzungo Arte Egunak, eta Hiru Binaka lehenengo egunean izango da.
“Helburu hauek ekarri nahi ditugu plazara: uda giroan ere kultur ekitaldien aniztasuna bultzatzea, diziplinartekotasuna eta esperimentazioa, herriko kultur eragileen, sortzaileen eta kulturzaleen arteko elkar-ezagutza eta saretzea bultzatzea”, adierazi dute antolatzaileek.
Parte-hartzeko modua
Hiru Binaka-n parte hartu nahi dutenek hilaren 18a —asteartea— izango dute horretarako epea. Bikoteka lan egin beharko dute, eta 20 minutuko hiru pieza behar dituztela jakinarazi dute. Ahal dela, diziplina ezberdinak bilatzen ari dira.
“Izena ematen dutenen artean osatuko dira bikoteak; beraz, izena ematen dutenei kolaborazio berriak egiteko prestutasuna eskatzen zaie”, adierazi dute.
Izena emateko edo informazio gehiago lortzeko, e-posta bidez jar daiteke harremanetan.