Emakumeek meatzaritzan izan duten protagonismoa erakutsiko dute Arditurrin
Emakumeen lana aitortuko dute Arditurri Egunean, datorren igandean. Gainera, ikazkintzan izan duten ibilbidea ikus ahal izango da hil osoan.
![emakumeak meatzaritza arditurri](https://oarsoaldea.hitza.eus/site/files/2023/07/img_20230711_122957_2.jpg)
Datorren igandean egingo dute Arditurri Eguna, hiru urteko etenaren ondoren. Meategiarekin eta parketxearekin gozatzeko aukera izango dute. Oiartzungo Udalak eta Gipuzkoako Parketxe Sareak egitaraua antolatu dute hilaren 16rako.
Emakumeek meatzaritzan izan duten presentzia eta egindako lana ikusarazi nahi dute. “Meategi guztietan aritu dira emakumeak lanean, baita Arditurrin ere, baina beraien ekarpena gutxietsia izan da eta ez du aitortzarik jaso”, adierazi dute udaleko ordezkariek.
Gaineratu dutenez, meatze-jardueran aritu ziren emakumeek ez zutela bizimodu “erraza” izan, “erronka eta oztopo askori” aurre egin behar izan ziotelako. Izan ere, emakumeei tradizionalki esleitutako lanak ez zituzten egiten.
Beraien lana aitortzeko eta genero-rol tradizionalen inguruan errotuta dauden estereotipoak eraisteko ekimenak antolatu dituzte aurtengo Arditurri Egunean.
Erakusketa eta murala
Igandetik aurrera, Aitzindariak, ikatzaren emakumeak erakusketa ikusteko aukera izango da. Uztaila osoan izango da ikusgai.
Argazki eta testigantzen bidez Asturiasko meatzeetan emakumeek egindako lana jasotzen du. Emakumeek sektorean izandako presentzia eta egiten duten ekarpena dokumentatzen duen ibilbidea da.
Hilabete osoan zehar egongo da erakusketa bisitatzeko aukera (17 eta 24ean izan ezik), 10:00etatik 14:00etara eta 16:00etatik 18:00etara (igande eta jai egunetan goizez bakarrik).
Erakusketaz gain, meatzeetan emakumeek ere egindako lana islatzeko mural erraldoia egiteko proiektua martxan dago.
Alaia Gaztelumendi artistak egingo du Arditurrin bertan. Datozen hilabeteetan joango da murala osatzen eta igandean azalduko du proiektua, 10:30ean.
Aurkezpenaren ondoren murala sortzeko lehen harriak biltzeko jarduera antolatu du Abaraxka ludotekak meatze inguruan.
Arditurriko Eguna
Meategia barrutik ezagutzeko bisita gidatuak ere antolatu dituzte igandean. Itxita egoten den Arditurri 3 erromatar garaiko meatze galeria ikusteko aukera ere izango da.
Fosilen eta garai geologikoen gaineko paleontologia tailerra eskainiko du Luberrik eta mineralen bila ere arituko dira. Doan izango dira ekintza guztiak eta sarrerak tokian bertan hartu beharko dira.
Oidultz dultzainero taldeak, Donavera eta Arretxe trikitilariek eta Izagirre pandero jotzaileak alaituko dute giroa eta txosna ere egongo da.
Egitaraua
- 10:30-14:00: Aitzindariak, ikatzaren emakumeak erakusketa.
- 10:30-14:00: Arditurriko argazki zaharren erakusketa.
- 10:30-14:00: Meategira bisita gidatuak.
- 10:30-12:00: Paleontologia tailerra.
- 10:30-11:30: Alaia Gaztelumendiren eskutik Arditurriko mural erraldoiaren aurkezpena.
- 11:00, 11:45 eta 12:00: Arditurri 3 Erromatar garaiko meatze galeriara bisita gidatuak (14 urtetik gorakoentzat).
- 11:00-14:00: Jolasak eta tailerrak.
- 12:00: Mineralen bila irteera gidatua.