Erakusleihoak ilustratzeko lehiaketa antolatu du Biyurrieneak
Itturri merkatarien elkartearekin batera antolatu dute lehiaketa. Datorren astean egin beharko dira ilustrazioak, eta parte-hartzaileek saria edukiko dute.
Biyurrieneak eta Itturri Oiartzungo merkatarien elkarteak lehiaketa bat jarri dute abian. Herriko komertzioetako erakusleihoak ilustratzea izango da helburua.
Parte hartu nahi dutenek datorren ostiralera arte —hilak 14— izango dute horretarako epea. Datorren astean —hilaren 17an hasiko dena— egin beharko dituzte ilustrazioak, bizpahiru orduko epean.
Izena emateko galdetegia prestatu du Biyurrieneak. Galdetegi horretan izen-abizenak eta telefono zenbakia adierazi beharko dira.
Parte-hartzaile bakoitzari komertzio bat esleituko diotela jakinarazi dute antolatzaileek. Ilustrazio baten bidez erantzun beharko dizkiote bi galderari: Zer suposatzen du saltoki hau zuretzako? eta Zer transmititzen dizu?.
Parte-hartzaile guztiek erosketa-bonua izango dute lehiaketarekin bat egin duen komertzio bakoitzean. Irabazlearentzako, berriz, 300 euroko saria izango dela iragarri dute.
