Joxe Mari Mendikuteren omenezko partida antolatu du Txostek
Txosten bultzatzaileetako bat izan zen Mendikute zena. Errebote partida et ekitalditxoa egingo dute Beheko Plazan, eta ondoren, bazkaria.
Joxe Mari Mendikute zena, 2019ko martxoan, Txosteko Etxeleku eta Nazabal pilotariekin. Pasa den abenduan hil zen Joxe Mari Mendikute. Hainbat saltsatan ibilitakoa zen; tartean, Txost Pilota Elkartean.
Datorren larunbatean —hilak 15— klubekoek omenaldi xume bat egingo diote. “Pilota munduari lotuta, Oiartzunen errebotea eta joko zuzenak berreskuratzeko talde lanean aritu zen, besteak beste”, azaldu dute Txosteko kideek.
Pilota elkartearen sorreran ere parte hartu zuen. “Egun erreboteak herrian bizirik jarraitu dezan bere aletxoa jarri zuen; isilean, nekerik gabe eta umoretik”, gaineratu dute.
Omenaldia Beheko Plazan izango da. Errebote partida jokatuko dute errebotean aritu izan diren eta egun aritzen diren pilotariekin Txosteko bi talde osatuta. 10:30ean hasiko da errebote partida.
Hori bukatuta, ekitaldi txiki bat egingo dutela iragarri dute. Hori bukatuta, denak elkarrekin bazkaltzen biribilduko dute eguna.
Mendikuteren omenez Txostek egin duen irudia.
