[Argazkiak] Karmenak koloretsu eta aldarrikatzaile hasi dituzte
Haurrak izan dira Karmengo Amaren Jaiei harrera egiten lehenak, holy festarekin. Adinekoen duintasuna aldarrikatu dute gero txupinerek.
Holy festak eztanda egin du haurren txupinazoko ekitaldian. 
Hasi berri dira 2023ko Karmengo Amaren Jaiak. Urtero bezala, haurrek egin diete lehen harrera —eta koloretsuena— karmenei, holy festarekin. 19:00etan izan da hori, Gudari plazan, eta bertatik Alkateordetzara egin dute bidea bizilagunek.
Txupinazoaren arduradunak, aurten, kakorratz taldeko Trintxerpeko emakumeak izan dira. Taldeko lau kidek, Mertxe Blanco, Magdalena Betancourt, Mari Fernandez eta Ruth Mariñok, bota dituzte diskurtsoa eta suziria 20:00etan, eta eztanda bikoitza izan da. Adinekoen duintasuna aldarrikatu dute, “entzunak izan nahi dutela” eta beste edozein herritarrek bezainbeste merezi dutela hori.
Eraso sexistarik gabeko jaiak eskatu dituzte, eta errepikatu dute adinekoak ez direla iragana, oraina baizik: “Bizitzak gure izena du. Aurrez aurre begiratzen bagaituzue, zuen isla ikusiko duzue. Urte batzuek besterik ez gaituzte bereizten”.
Bihar erreportajea argitaratuko du HITZAk emakume horien adierazpenekin. Oraingoz, haur nahiz helduen txupinazoen irudiak:
