Ogasunaren aurrean euskaraz serio, eta jatetxeetan euskaraz pozik
Oarsoaldeko Euskara Batzordeak 2022ko errenta aitorpena euskaraz egin dutenen arteko zozketaren irabazleen berri eman du.
Oarsoaldeko Euskara Batzordeak —eskualdeko lau udalek dute partaidetza bertan— eman dizkie ogasunaren aurrean euskaraz jardun duten herritarrei sariak. Izan ere, aurten ere, errenta aitorpena euskaraz egiteko deia egin du batzordeak, eta horrekin bat egin duten oarsoarren artean bi lagunentzako otorduak zozkatu ditu, herri bakoitzeko bana. Aitorpena euskaraz egiten jarraitzeko deia luzatu dute batzordekideek, eta gaztelaniaz egiten dutenei aurrera urratsa egiteko gonbita luzatu diete.
Errenteria-Orereta: Leire Mazizior zinegotzia, Olatz Ezpeleta irabazlea, eta Gazteluko Haritz Erzibengoa.
Errenteria-Oreretako irabazlea Olatz Ezpeleta izan da. Errenteriako Udaleko Hizkuntza Berdintasunerako zinegotzi Leire Maziziorrek eman zion saria. Ezpeletak Gaztelu ostatuan gozatuko du otorduaz, beraz, jatetxeko Haritz Erzibengoa ere izan zen saria ematen.
Lezo: Iker Salaberria Euskara zinegotzia, eta Izaro Susperregi (Mikel Susperregi irabazlearen arreba).
Lezon, Mikel Susperregirentzat izan da saria (haren izenean haren arrera Izaro Susperregik jaso zuen). Sagarzulo jatetxean egokitu zaio otordua, eta Iker Salaberria Euskara zinegotziak eman zion saria.
Oiartzun: Lorzako Maider Martinez, Jokin Marin irabazlea, eta Garazi Urdanpilleta alkateordea.
Oiartzunen, berriz, Jokin Marin izan da zorteduna. Garazi Urdanpilleta alkateordearen eskutik jaso zuen saria, ekitaldian Lorza higiezin agentziako Maider Martinez lagun izan zuela. Tolaitan otordu ederra egokitu zaio Marini.
Pasaia: Arandoko Maria Rodriguez, Larraitz Illarregi irabazlea, eta Laura Re Euskara zinegotzia.
Pasaian, Larraitz Illarregik gozatu ahal izango du Trintxerpeko Arando otordua. Laura Re Euskara zinegotziak eman zion saria, Arandoko Maria Rodriguezen laguntzarekin
