Eraso egin diote banketxe bati
Eguerdian izan da erasoa. Pertsona batek disolbatzailea isuri du banketxearen lurrean eta ihesari eman dio ondoren.
Suhiltzaileak lanean, eta Ertzaintza hesitutako eremuaren barruan. Biteri kaleko BBVA banketxea eraso dute gaur eguerdian. Eusko Jaurlaritzaren Segurtasun Sailak HITZAri jakinarazi dionez, 11:50ean pertsona bat sartu da sukurtsal horretan bidoi bat eskutan zeramala. Bidoi horretan disolbatzailea zeraman, eta banketxeko lurrean isuri du likidoa. Ondoren, banketxetik ihesi atera da.
Gertaeraren unean bost langile eta lau bezero ziren banketxean.
Ertzaintzak banketxe ingurua hesitu du, eta suhiltzaileen bi kamioi bertaratu dira, azken horiek, isuritako likidoa garbitu eta sukurtsala aireztatu dute. Segurtasun saila ikertzen ari da gertatutakoa, baina egilea dagoeneko identifikatu dutela esan du; haren bila ari dira orain.
