Hilaren 20an, Altzateko babes ofizialeko etxebizitzen zozketa
Behin betikoz zerrendak osatu eta gero egingo dute zozketa. 11:30ean izango da, Gezala Auditoriumean. Itxaron zerrenda ere osatuko da.
Behin betiko zerrendak onartuta (Lezoko Udalaren webgunean kontsulta daiteke), Altzateko babes ofizialeko hamasei etxebizitzak zozkatzeko egunaren berri eman du udalak: hilaren 20an, osteguna, izango da. Gezala Auditoriumak jasoko du zozketa ekitaldia, 11:30ean.
Udalak zehaztu du behin-behineko zerrendarako bost alegazio aurkeztu direla, eta horien arabera bi akats antzeman dituztela. Horiek soluzionatuta, behin betiko zerrenda egin eta hori izango da zozketaren oinarria.
Honakoa izango da zozketaren metodologia: notarioak zenbaki bat aterako du etxebizitza egokituaren zozketarako (etxebizitza bat dagokie); ondoren, guraso bakarreko familien kupoaren bi zenbaki aterako ditu (bi dagozkie); segidan, gazteen kupoaren beste bi (bi dagozkie); azkenik, kupo orokorrerako 11 zenbakiak aterako ditu. Lehen hiru kupoetako zozketetan etxebizitza bat egokitu zaienek ezin izango dute parte hartu kupo orokorrekoenean. Kupo berezietan (egokituena, gurasobakarrena eta gazteena) onuradun izaten ez denak, baldintzak betetzen dituen hurrengo kupo berezietan etxebizitza eskuratzeko aukera izango du. Bestela, orokorrekoen zozketan sartuko da.
Kupo bakoitzeko zenbaki bat gehiago aterako da, denen itxaron zerrendak egin ahal izateko: zenbaki horretatik aurrera ezarriko da itxarote zerrenda.
