Antzerki testu laburren lehiaketa, Lezon
Lehenengoz ekingo diote proiektuari udalak eta Hika Teatro konpainiak. Gazteei zuzendutakoa da batez ere. Saridun nagusiak 1.000 euro jasoko ditu.
Lehenengoz, antzerkirako testu laburren lehiaketa egingo dute Lezon. Hika Teatroa konpainiak gidatuko du egitasmoa, Lezoko Udalarekin batera. Batik bat euskal dramaturgo edo idazle gazteei zuzendutako proiektua da, eta aurkeztuko diren pieza guztietatik sei aukeratuko ditu epaimahaiak: horietatik gutxienez bi 35 urte baino gutxiago dituztenenak izango dira. Gainera, hizkuntza irizpidea ere badu lehiaketak: hautatuak izango diren seietatik, lau euskarazkoak izango dira. Generoari dagokionez parekidetasuna ziurtatuko da. Gaurtik irailaren 14ra arte aurkez daitezke lanak, PDF formatuan: posta elektroniko batera bidali behar dira.
Lehiaketa testuinguruan jartzeko, udalak oroitarazi du Hika Teatroa Txalostean izeneko proiektua ari dela lantzen Lezon. Horren barruan antzerkiaren gaineko bitartekaritza, sentsibilizazioa eta publiko berriak hurbiltzeko lanean ari dira. “Gazteak jai giroan eta modu parte hartzailean arte eszenikoetara erakartzea” du helburu Txalosteanek.
Sei lanak aukeratuta, beste fase bati ekingo diote. Urriaren 7an kale jaialdia egingo da Lezon, eta sei pieza horien irakurketa dramatizatua egingo dute sei aktorek (hiru profesional; eta beste hiru Lezokoak, herriko antzerki taldeetan edo interpretazio eskoletan daudenak). Sei interprete horiek hiru antzerki zuzendariren laguntza izango dute irakurketa prestatzeko. Hortik irabazle bat aterako da: publikoak erabakiko du zein den onena, zuzeneko bozka bidez. Saridunak 1.000 euro jasoko ditu.
Lehiaketaren oinarri zehatzak jakiteko, irakurri beheko atalean dauden azalpenak.
Eremu geografikoa
Deialdira euskararen eremu geografikoko dramaturgo, idazle edo idaztea gustukoa duen edozein hiritar aurkez daiteke. Hau da, Gipuzkoa, Araba, Bizkai, Nafarroa, Zuberoa, Lapurdi edo Nafarroa Beherekoek parte har dezakete.
Lanak aurkezteko epea
Gaurtik (2023ko uztailaren 14a) 2023ko irailaren 14ko eguerdiko 14:00etara arte. Hortik aurrera ez da testu gehiagorik jasoko. Testuak PDF formatuan posta elektroniko honetara bidali beharko dira. Testuarekin batera 8-10 lerroko sinopsia bidali beharko da, etab aita pertsonaiei buruzko hiru lerroko azalpena. Horrez gain, idazlearen NA agiriaren kopia eskatzen da.
Luzera
Gehienez 15 minutuko antzerki testu laburrak izango dira, eta gutxienez 10 minutukoak.
Estiloa
Antzezlanak komedia/ absurdoa/ tragikomedia estiloen barne kokatuko dira.
Pertsonaiak
Bi gehienez.
Gaia
Gaia librea da. Pieza guztietan, ordea, pertsonaia protagonista gazte bat izango da. Horrez gain, Lezoko herriak ere, modu librean, traman agertu beharko du.
Ebazpena
Sei dramaturgo finalisten izenak irailaren 27an argitaratuko dira. Egun berean iragarriko dira ere urriaren 7ko lehiaketan parte hartuko duten hiru zuzendari profesionalen izenak eta sei aktoreenak (hiru profesional eta hiru amateur).
Lehiaketa
Mikroteatro testu horien irakurketa dramatizatua urriaren 7an egingo da Lezon, kalean egingo den festa handian. Testu irabazlea bertan hautatuko da.
Saria
Sari bakarra izango da, 1.000 eurokoa. Azken erabakia publikoak hartuko du, jakin gabe testu bakoitza zein dramaturgori dagokion eta zein zuzendarik zuzendu duen. Testu irabazlea zein den jakin ostean, orduan bakarrik emango da informazio guztia.
Testuak ikusgai
Jaialdiaren ostean, egileak oztoporik izan ezean, irakurketan parte hartutako sei testuak ikusgai izango dira Lezoko Udalaren webgunean; astero bat, nahi duen orok irakurri ahal izateko.
