Orain, Euskal Herrikoaren bila
Eskuz pilotako Euskal Herriko herriartekoaren finalerdiak jokatuko ditu bihar Oiartzunek Arabako Guardiaren kontra.
Oiartzungo pilotariak, Gipuzkoakoaren ospakizunetan. Gipuzkoako Herriartekoaren txapeldun izanda, ez da bidea bukatu. Oiartzunek Euskal Herrikoa nahi du. Asteburu honetan jokatuko dituzte nazioko eskuzko herriartekoaren finalerdietako partidak oiartzuarrek. Bihar (larunbata) zehazki. Arabako Guardia izango dute aurrez aurre.
Zumarragako Beloki pilotalekuan jokatuko dituzte finalen aurreko hiru partidak, Gipuzkoako herriartekoaren dinamika berberarekin: kadeteek, gazteek eta seniorrek partida bana jokatuko dituzte Guardiakoen kontra. Horietatik bi irabazten dituena, hilaren 23an Zumarragan bertan jokatuko den finalerako txartela lortuko du.
Beste finalerdia nafarren eta bizkaitarren artekoa izango da. Zehazki, Leitzak eta Markina-Xemeinek jokatuko dute finalerako beste plazaren bila. Igandean dira haien hiru norgehiagokak.
Finalerdietan, Oiartzun faborito da. Baina kantxan azaldu behar da ustezko nagusitasun hori. Jada eskarmentua badute herriko pilotariek, beraz, duten joko mailak eta esperientziak haien aldeko izan behar du.
