Madalenetako omenduek bihar jasoko dute ohorezko oroigarria
Herritarren aitortzarako ekitaldia Niessen Kulturgunean izango da, 18:30ean. Kartel lehiaketen irabazleei ere egingo diete oles.
Goian, Juneren Hegoak elkarteko ordezkariak; behean, Gurutze Gorrikoak. Gurutze Gorria eta Juneren Hegoak izango dira etzi hastekoak diren madalenetako omenduak. Horregatik, ohikoa den bezala, herri ekitaldia egingo dute errenteriarrek aurrez aurre aitortza egin diezaieten, eta jaietako ohorezko oroigarria jaso dezaten. Biharko (osteguna) 18:30ean hasiko da ekitaldi hori, Niessen Kulturgunean. Biharko herri aitortzaren ondoren, hurrengo hitzordua etzi (ostirala) izango dute, 19:00etan, udaletxean: 2023ko Madalen Jaien txupina eurek botako dute.
Gurutze Gorria herritar zaurgarrien eta beharrean dauden alde egiten duen lanagatik aitortuko dute. Juneren Hegoak-ek, berriz, haurren gaixotasun, heriotza edo dolu esperientzia bizitzen ari diren familien ondo-ondoko erakundea da.
Bi erakundeez gain, madalenetako kartel lehiaketa ofizialaren irabazle izan den Critobal Aguilo Dominguezi, eta haurren kategoriako irabazle Joanes Arrieta ere izango dira Niessengo oholtzan, dagokien saria emango dietelako.
Ekitaldia irekia eta doan da, beraz, Errenteriako Udalak hala nahi dutenei joateko gonbita egin die.
