LAB eta CCOO sindikatuek akordioa lortu dute Gureak Ikuztegia enpresan
Akordioak, 150 langile baino gehiagori eragingo dio, "erosteko ahalmena bermatzeaz gain, langileen lan eta bizi baldintzak nabarmen hobetuko dituen neurriak ekarriko ditu".
Oreretako Gureak Ikuztegia enpresan akordioa erdietsi dute LAB eta CCOO sindikatuek. LAB sindikatuak helarazitako prentsa oharrean azaldu duenez, “erosahalmena eta hobekuntza sozial garrantzitsuak bermatzen dituen akordioa” lortu dute. LAB eta CC OOk enpresa zuzendaritzarekin lortutako aurreakordioa gehiengoz berretsi du langileen batzarrak”.
Akordioak, 150 langile baino gehiagori eragingo dio, “erosteko ahalmena bermatzeaz gain, langileen lan eta bizi baldintzak nabarmen hobetuko dituen neurriak ekarriko ditu”.
Akordioaren puntu nagusienak, ondokoak dira, “LABek negoziazioaren hasieratik defendatu dituenak”: 2022-2023-2024 KPIa bermatzea, lanaldia murriztea, aldi baterako ezintasun osagarria hobetzea, gaueko plusa %20ra igotzea; Kilometrajearen ordainketa handitzea, edota gidari kategoria berria C txartelarekin.
Gureak Ikuztegiko langile guztiak zoriondu ditu sindikatu abertzaleak, eta oso positibotzat jo du aurreakordioa, “baina ez dugu ahaztu zein den Enplegu Zentro Berezien (EZB) errealitatea”. Halaber, konpromisoa hartu du LABek EZB langileak modu kolektiboan antolatzen jarraitzeko eta sektore osoko lan baldintzak duintzeko eta hobetzeko borrokan jarraitzeko: “Enpresa Hitzarmen Kolektiboak hobetzeko borrokatuko gara, argi izanik sektoreko enpresa guztientzat lurzoru duin komuna sortu behar dela, Euskal Herriko Hitzarmen Kolektibo baten bidez”.
