Arditurriz eta Bide Berdeaz gozatzeko aplikazioa sortu dute
Udalak eta Oarsoaldeak tresna digitala atera berri dute. Bide Berdeari buruzko informazioa ematen dute, eta planak proposatu, meategirako sarrerak saltzeaz gain.
Arditurri Bideberdea app-aren irudietako bat. Arditurriko Bide Berdea —orain hala du izena— izatez Oiartzungo meategiak eta Pasaiako Portua lotzeko sortu zuten trenbidearen oinordekoa da.
Oarsoaldea osoa zeharkatzen du bide horrek, eta bideak, bere baitan, bisitatzeko hainbat txoko dituela gogorarazi dute Oiartzungo Udalak eta Oarsoaldea Garapen Agentziak.
Izan ere, bi erakunde horiek, Eusko Jaurlaritzarekin elkarlanean, Bide Berdearekin gozatzeko webgune eta aplikazio berria sortu dute. Meatzeen, bidearen beraren eta barruan dituen bisitagarriei buruzko informazioa helarazten dute.
Aiako Harria Parke Naturala, trenbide zaharraren aztarnak, Soinuenea herri musikaren txokoa, Luberri geologia museoa eta beste hainbati buruzko informazioa ematen dute.
Gainera, planak proposatzen dituzte, eta horiek aurrera eramateko egin beharrekoak azaldu: bizikleten alokairu zerbitzua eta jatetxe eta ostatuen informazioa ematen dute, esaterako.
Horrez gain, meategietan sartzeko txartelak bertatik salduko dituztela jakinarazi dute.
Aplikazio berria
Webguneaz gain, aplikazio bat sortu dute sakelako telefonoetarako, Arditurri Bideberdea izenekoa. Besteak beste, Arditurrin bertan erabiltzeko jolasa sortu dute. Hango txoko eta sekretuak ezagutzeko aukera ematen du.
“Misterioz beteriko mundu batean sartu eta intxixu eta basandereen laguntzaz meatzearen barruan ezkutatu duten Aiako Harriaren bihotza berreskuratzeko erronka izango dute bisitariek”, jakinarazi dute sortzaileek.
Gaineratu dutenez, tresna digital berriak eskualdeko turismoa sustatu nahi du. Ondare historiko eta kulturala aintzatetsi nahi dute, mugikortasun jasangarria bultzatzen duten bitartean.
