Donibaneko sokamuturrari buruzko oharrak eman ditu udaltzaingoak
Hilaren 25ean eta 31n izango da ekitaldia. Larrialdi kasuetan SOS Deiak edo udaltzaingoarekin harremanetan jartzeko gogorarazi dute.
Datorren igandean —hilak 23— hasiko dira Donibaneko Santioak. Pasaiako Udaltzaingoak ohar batzuk eman ditu festetako ekitaldi bati buruz; sokamuturra izan dute hizpide.
Hilaren 25ean eta 31n egingo dute ekitaldi hori, 08:00etatik 09:00etara. Donibane kaleko 19 zenbakitik 93ra bitartean izango da.
Udaltzaingoak zenbaki horien artean bizi diren sanjuandarrei eskatu die ez daitezen etxetik atera sokamuturrak irauten duen bitartean.
Larrialdi kasuetan, Udaltzaingoarekin —943 004 300 da telefono zenbakia— eta SOS Deiak-ekin —112ra deituta— harremanetan jartzeko eskatu dute.
Horrez gain, 16 urtetik beherako gazteek sokamuturrean ezin dezaketela parte hartu nabarmendu dute. “Ezin dute, ezta ere, parte hartu, alkoholdun edariren baten eraginpean edo substantzia sorgorgarrien edo psikotropikoen mendean daudenek”, azaldu dute udaltzainek.
“Borondatezko gaitasuna murriztua” dutenek, halaber, ezingo dute parte hartu.
