[Argazkiak] Gozo iritsiko dira 'txunpa, txunpa'-ra
Jai batzordearen herri bazkarian dozenaka eta dozenaka herritar bildu dira. Txupinazoen atarikoak ederki asko girotu dituzte.
‘Betoketa ariketak egitea’ esamoldea kirolari lotutako terminoa omen. Eta ‘txunpa, txunpa’ esatea, musikari dagokionez, bakailaoarekin harremana zuen (eta duen) musika estilo batekin lotzen da. Bada gaur eguerdian, Errenteria-Oreretan, bi horiek batu, eta madalenekin harremandu dituzte: ‘txunpa, txunpa’-rako (hobeto ulertzeko, jaien hasieran EMKE bandak jotzen duen Zentenarioa pasodoblea da, herri hizkeran) girotze ariketak egin dituzte Jai Batzordearen herri bazkariak.
Herritar asko bertaratu da otordura. Litekeena da madalenen aurretiko bazkari horretako mahaikideen errekorra gainditu izana. Izan ere, goizean ubel hasi den eguna, jada eguerdirako epelerantz zihoan eta. Hala izan dira bazkarian, epel, gozo, berotzen.
Jai batzordeko eragileetako ordezkariak izan dira bertan. Baita madalenetan oles egingo dieten Juneren Hegoak elkarteko eta Gurutze Gorriko kide asko-asko ere. Ordezkari politikoaz ez dira falta izan, beharbada gaurkoan ‘ordezkari’ eta ‘politiko’ eranskailuak soinetik kenduta, herritar fidel modura herri bazkarian.
Madalenak ez dira hasi ere egin. Baina bada giroa. Herri giroa. Bazkariaz gain, gaurkoak badira beste ekitaldi asko. Tartean txupinazoak. Ondoko zerrendan, horiek denak. Zerrenda irakurrita iritsiko zarete bazkariko argazki sortara.
Gaurko (hilak 21, ostirala) egitaraua:
- 17:15 BATUBURRUNBA. Zumarditik abiatuta elkarrekin joango gara txupinazo txikira.
- 18:00 MILA KOLORETAKO TXUPINAZO TXIKIA. Koldo Mitxelena plaza.
- 18:30 ANIMAZIOA. Gernika plaza.
- 19:00 TXUPINAZOA jaien hasiera iragartzeko.
- Omenduak izango diren JUNEREN HEGOAK eta GURUTZE GORRIAREN ERRENTERIAKO HERRI BATZARRA elkarteek botako dute. Herriko plaza. Errenteriako Musika Bandak “El Centenario” ohiko pasodoblea joko du, eta modu horretan herriko jaiei hasiera emango zaie.
- PANTAILA ERRALDOIA. Zumardia.
- HOLI FESTA. Gernika plaza. Era berean zuzenean txupinazoa ikusi ahal izango da honako helbidean: herribizia.errenteria.eus.
- Jarraian, Udaletxetik abiatuta, Errenteriako Musika Kultur Elkartea, Errenteriako udal txistulari taldea eta Errenteriako txistulariak ibiliko dira BURUHANDI ETA ERRALDOIEKIN batera. Herriko kaleetan zehar.
- 20:30 ERRIOLA GUNEAREN IREKIERA. Koldo Mitxelena plaza. Antolatzailea: Orereta ikastola.
- 21:00 BERTSO FESTA Xenpelar bertso eskolaren eskutik. Erriola Gunea (Koldo Mixelena plaza). Antolatzailea: Orereta ikastola.
- 22:00 Kontzertua: ARBASOAK. Panier-gunea. Antolatzailea: Oaingozhau kolektiboa.
- 22:00 TECNO GAUA. DJ Pattor & DJ Aces. Gernika plaza.
- 22:00 Kontzertua: LEE JUNIOR, JUAN MANUEL (La Linea), ANDRES SOTO DJ. Francisco Gaskue 1. Antolatzaileak: Taberna Iñaki, Bar AXA eta Oiartzun Taberna.
- 22:45 SUZKO ZEZENEN ENTZIERROA. Ibilbidea: Koldo Mitxelena ikastetxea, Biteri Txiki, Xenpelar, Foru plaza, Herriko plaza.
- 23:00 Kontzertua: SEGA SOUND KILLERS. Lino-gunea. Antolatzailea: Oaingozhau kolektiboa.
- 23:00 GAUEKO DANBORRADA HANDIA. Alaberga auzotik irtengo da, Deiadar fanfarrea lagun duela. Ibilbidea: Alaberga, Biteri kalea, Maria Lezo, Madalen kalea, Herriko plaza, Zumardia, Biteri txikia, Biteri kalea eta Alaberga. Gauerdian, 00:00etan, Udaletxearen aurrean, “El Centenario” ohiko pasodoblea joko dute. Antolatzailea: Alabergako Arditurri AE.
- 23:59 YO HE BAILADO. Iker Rodriguez & DJ Mitx & Niko DJ. Xabier Olaskoaga plaza.
- 23:59 KALEFESTA 2023. Zuzen tabernaren plaza. Antolatzailea: Zuzen Gastropub.
- 00:00 DJ BULL. Madalena kalea. Antolatzailea: Sindikato taberna.
- 00:00 Kontzertua: KHYMAIRA. Panier-gunea. Antolatzailea: Oaingozhau kolektiboa.
- 00:30 ZEZENSUZKOA danborradarekin batera. Zumardia.
- 01:00 Kontzertua: IRATZAR ERROMERIA. Lino-gunea. Antolatzailea: Oaingozhau kolektiboa.
- 01:00 Kontzertua: NEOMAK. Zumardia.
