[Erreportajea] Kalea garbi egotea denen ardura da
42 langile arduratuko dira madalenetan herriko kaleak garbi mantentzeaz, eta gaur hasiko dute beren jarduna txupinazoarekin. Udalak, gainera, totemak eta igluak jarri ditu herritarren eskura.
![](https://oarsoaldea.hitza.eus/site/files/2023/07/madalenetako_garbiketa.jpg)
Atzera kontaketa bukatu da: hemen dira 2023ko madalenak. Herriko festek gaurko 19:00etan egingo dute eztanda ofizialki, elkarte omenduek udaletxeko balkoian suziria pizten dutenean. Une horretan, Errenteria-Orereta bost eguneko jai giroan murgilduko da, eta herritarrek kaleak hartuko dituzte. Herriko festak kalean egoteko egunak dira, eta herritarren eta bisitarien joan-etorriak nabarmenak izango dira festek irauten duten denboran; eta, nola ez, hondakin mordoa sortuko da festa giro orotan bezala. Txupinazo ondorengo momentutik, garbitzaileek beren jardunari ekingo diote, herria egunero garbi egon dadin.
Orotara, 42 langile arduratuko dira madalenetan herria garbi mantentzeaz, eta gehienbat herriko erdigunean ibiliko direla jakinarazi du Bernar Lemos Hiri Mantenuko zinegotziak. Txupinazo nagusiaren ondoren, zazpi langilek ekingo diote Herriko Plaza garbitzeari.
Txupinazoa madalenen une hunkigarrienetako bat da, jaiei hasiera ematen dielako, eta jendetza biltzen da udaletxe parean. Hondakin mordoa pilatzen da, eta honakoa aldarrikatu du Lemosek, jendeak eramaten dituen produktu batzuen inguruan: «Txupinazoa bukatuta, langileek Herriko Plaza garbitzen dute, baina kamioiak ezin du 21:00ak arte sartu. Kamioiaren lana da garbiketa errematatzea. Hori dela eta, jendeari eskatuko nioke irina eta ketchupa bezalako produktuak ez eramatea, pasta bat sortzen dutelako lurrean. Kamioia ez da bi ordu geroago arte pasatzen, eta zorua irristakor uzten du pasta horrek, arriskutsua izan daiteke jendearentzako».
Goizeko lehen orduan
Gainerakoan, garbitzaile brigada goizean goiz hasiko da jardunean, herria garbi mantentzeko helburuarekin. Horrez gain, ura erabiltzen dutenean, garbitzaileek limoi usaineko produktu bat gehitzen diotela jakinarazi du Hiri Mantenuko zinegotziak, «usainarentzako eta higiene kutsu bat» emateko.
Errenteriako Udalak ere hainbat baliabide jarriko ditu herritarren eskura. Herriko hainbat txokotan bederatzi totem jarriko dituzte, batez ere erdigunean. Totemez gain, bost iglu ere ahalbidetuko ditu udalak hondakinak botatzeko.
Madalenetan hondakin mordoa sortuko bada ere, Ostari Ostalarien Elkarteak eta udalak ingurumenaren aldeko «aletxoa» jarri dute. Ostarik 10.000 edalontzi berrerabilgarri erosi ditu festetarako «hondakin plastiko gutxiago» sortzeko xedearekin. «Ideia da edalontzia norberarentzako izatea eta edalontzi berrerabilgarriak erabiltzeko ohitura hartzea», esan dute Ostariko kideek