Teo Alberro: "Horrelako gertakariak gizarte osoa kaltetzen duten izurritea dira"
Pasai Antxon asteartean izandako gertakari larriak gaitzesteko elkarretaratzea egin du udalak gaur, Arizabalo Jauregi aurrean.
Elkarretaratzea gaur, Arizabalo Jauregiaren aurrean. Gogor salatu du Pasaiako Udalak asteartean Antxon izandako gertakariak. Udalean ordezkaritza duten alderdi politikoetako ordezkariak, eta langileak izan dira Arizabalo Jauregiaren sarreran, baita Gipuzkoako Foru Aldundiko Berdintasun arloko zuzendari Nerea Isasi, Gipuzkoako Batzar Nagusietako EH Bilduren ordezkari Estitxu Elduaien eta Haritz Perez, eta Pasaiako Portuko Agintaritzako presidente Joakin Telleria eta David Candelario zuzendaria. Udalak deitu du elkarretaratzera.
Astearte goizaldean, gizonezko bat atxilotu zuen Antxon Ertzaintzak, giza hilketa saiakera leporatuta. Atzo bertan jakinarazi zuen Segurtasun Sailak, ez diotela soilik giza hilketa saiakera egotzi, genero indarkeriako delitu bat ere leporatu diotela atxilotuari. Bidegorri ondoko arma zuri bidezko erasoa baino lehen, emazte ohiari haren etxeko giltzak lapurtu eta bertako objektu batzuei su eman zien; labanak ere bertatik lapurtu zituen gero gizonezkoa erasotzeko.
Elkarretaratzearen ostean adierazpenak egin dituzte Nerea Isasi eta Teo Alberro Pasaiako alkateak. Erasoa pairatu zuen emakumeari, zein zauritutako gizonari “babesa” eman die Isasik, “informazio gehiago ez dagoen bitartean ezin dugu ezer gehiago gehitu, gure babesa adierazi biei”.
Teo Alberro: “Horrelako gertakariak gizarte osoa kaltetzen duten izurritea dira”
Udalaren izenean gertakari larrien aurrean “gaitzespenik sakonena” azaldu du Alberrok: “halaber, gure elkartasuna eta hurbiltasuna erakutsi nahi dizkiegu alde batetik, indarkeria matxista jasan duen emakumeari, eta bestetik, labankadaz zauritua izan den gizonari. XXI. mendean horrelako gertakariak pairatzea benetako izurritea da gizarte osoa kaltetzen duena”.
Biolentzia ekintza ororen aurrean, “eta bereziki emakumeenganako indarkeriaren aurrean” udalak eta pasaitar orok tinko erantzungo dutela beti gaineratu du Pasaiako alkateak.
Gipuzkoako Foru Aldundiak, halaber, adierazpena helarazi du komunikabideetara. Pasaian gertatutako indarkeria matxista kasua “irmoki” salatu du, “foru erakundeak elkartasun osoa eta babesa eskaini nahi die erasoa pairatu zuten prestonei, horietako bat larri zauritua, nahiz horien lagun eta senitartekoei”.
Adierazpenean, gizonen eta emakumeen berdintasunaren aldarrian jarri du azpimarra foru aldundiak eta berretsi, emakumeen eta pertsona ororen duintasuna eta integritate fisikoa eskubide urra ezinak direla: “Halako jarrera matxistek eragindako indarkeriak zuzen-zuzenean eraso egiten die elkarbizitzari eta giza eskubideei, eta ez du lekurik gure lurraldean”.
