1936ko errepresaliatuak, gogoan
Ostegunean beteko dira 87 urte tropa frankistak Oiartzunen sartu zirenetik. Errepresioa jasan zuten udal ordezkariak gogorarazi dituzte.
Pankarta jarri dute udaletxeko balkoian. Datorren ostegunean, hilak 27, beteko dira 87 urte tropa frankistak Oiartzunen sartu zirenetik. Beorlegi koronela zen tripa haien burua, eta Azainetik barrena Karrikara iritsi ziren.
Goikoetxen jarri zuten kanpamendua, eta Altzibarren errepublikazaleek gogor erantzun zieten. Hala ere, 1936ko uztailaren 27 hartan, Ortiz de Zarateren tropak iritsi ziren Ergoienera, eta denak batera sartu ziren herriko plazan.
Udaletxea hartu zuten, eta zinegotzi abertzaleak atxilotu zituzten, tartean Feliciano Belderrain alkatea. Nafarroako Ezkaba gotorlekura eraman zituzten.
Leontzio Aranburu Agirre lehen alkateordea eta Manuel Irigoien Mitxelena bigarren alkateordea fusilatu zituzten, eta haien gorpuak desagerrarazi. Gainera, Segundo Berrondo zinegotziaren semea ere hil zuten.
Jeronimo Ugaldebere Labandibar, Esteban Goienetxe Arozena, Luziano Aristizabal Etxeberria eta Jose Ignacio Odriozola Oiartzabal zinegotzi abertzaleeek osatzen zuten 1936ko udalbatza hura, eta haiek ere espetxealdia pairatu zuten.
Horregatik guztiagatik, Katin Txiki elkarteak pankarta jarri du udaletxean. “Bide batez”, adierazi du elkarteak, “Oiartzungo Udalak eta Oiartzungo herriak jasan zuen errepresio bortitza salatu nahi dugu inoiz berriz horrelako genozidiorik gerta ez dadin”.
Memoria historikoa lantzen duen elkarteak egia, justizia eta erreparazioa eskatu ditu, baita berri ere ez errepikatzearen bermea ere.
