Irulegiko aztarnategira ibilaldia, abuztuaren 26an
Oiartzungo Udalak txangoa antolatu du abuztuko azkeneko larunbaterako. Aranzadiko arkeologoek egiten duten lana azalduko dute.
Irulegiko aztarnategiko lana bertatik bertara ezagutuko dute. Abuztuko kultur eskaintza aurkeztu zuenean, Oiartzungo Udalak aurreratu zuen Irulegiko aztarnategira txangoa antolatuko zuela. Abuztuaren 26an izango da, eta izena eman daiteke jada.
Irulegiko Eskua aurkitu izanak euskararen jatorriari “argia eman” diola ziurtatu du udalak. “Euskararen jatorriari buruzko galderei erantzun eman eta, aldi berean, berriak sortu ditu. Arkeologia- eta hizkuntza-munduan ere berrikuntza esanguratsuak ekarri ditu”, gaineratu du Oiartzungo Udalak.
Horregatik, euskal ondarearen eta euskararen “mugarri” bihurtu duten aztarnategira antolatu dute txangoa.
Burdin Aroko herrixka, eskuaren etxea eta XV. mendeko nafar gaztelua bisitatu eta arkeologoen lana ezagutzeko aukera izango da datorren hileko azkeneko larunbatean. Aranzadiko arkeologoek eurek emango dituzte han egiten duten lanari buruzko azalpenak.
Autobusa
Abuztuaren 26ko 08:30ean aterako da Nafarroarako autobusa, Manuel Lekuona bibliotekako geltokitik. Ilundaingo aparkalekuan hasiko da bi ordu inguruko bisita gidatua eta bertatik oinez igoko dira Irulegi mendiko aztarnategira.
14:00ak aldera bueltatuko da autobusa herrira. Hamaiketakoa, ura, mendiko arropa eta oinetako erosoak eramatea gomendatu dute antolatzaileek.
Adin-arte tarte guztientzako egokia izan daiteke txangoa, baina, ohartarazi dutenez, bidea aldapatsua da eta gailurrera igotzeko 150 eskailera igo behar dira. Horregatik, gutxienez, 8 urte izatea gomendatu dute.
“Bisitaldia ez dago aniztasun funtzionala edota mugikortasun murriztua duten pertsona batzuentzat egokitua”, adierazi dute.
Izen-ematearen xehetasunak
Txangoa doan izango da, eta udaletxean eman beharko dute izena bertara joan nahi dutenek. Izena abuztuaren 18a baino lehen eman beharko da, telefonoz —943 490 142— edo posta elektroniko bidez.
Izena ematerakoan, izen-abizenak eta telefono zenbakia edota e-posta helbidea jakinarazi beharko dira.
