Pasaka txapelketetako finalak, igandean eta asteartean
Gazte Mailako finala Iturriozko pilotalekuan jokatuko dute, etzi. Helduen bi finalak abuztuaren 1ean izango dira, Kontzejupean.
Pasa den asteazkenean jokatu zituzten finalerdiak. Txostek antolatzen dituen pasaka txapelketak azken txanpan sartuko dira. Aste honetan jokatu dituzte finalerdiak, eta modu horretan finalak erabaki dituzte.
XII. Txapelketa Herrikoia jokatu dute aurten, bi kategoriatan: helduak eta gaztetxoak. Gazteenen finala Iturriozko festen ekitaldien barruan jokatuko dute, datorren igandean —hilak 30—, auzoko frontoian. 17:00etan hasiko da gazteen arteko partida hori.
Iradi eta Ormaetxeak osatutako bikoteak Etxepare eta Etxeberria izango ditu parez pare.
Helduen finala zein Gipuzkoako Txapelketakoa datorren asteartean —abuztuak 1— jokatuko dute, Kontzejupean. Kasu honetan, 19:00etan hasiko dira . Honakoak izango dira partidak:
XII. Txapelketa Herrikoia, Helduen Maila
- Mitxelena — Azpiroz / Noble — Aranburu.
VIII. Gipuzkoako Txapelketa
- Urbieta II.a — Urbieta III.a / Lizaso — Urtasun.
Partidak bukatzean, sari banaketa egingo dute.
