Itsaso berdean, lau banderen estropadak
Hibaikak, San Juanek eta San Pedrok hitzordua dute asteburu honetan Hondarribikko itsasoan.
Hibaikako emakumeak larunbatean Donostian jokatutako estropadan. Argazkia: Goral Asteburu honetan, estropaden festa Hondarribiko itsasora eta herrira gerturatuko da. Abuztuaren 5ean eta 6an, lau bandera jokatuko dituzte Euskotren, Eusko Label, KAE 1 eta KAE 2-ko batelek.
Larunbatean, hilak 5, Euskotren ligakoek XV. Txingudiko Bandera – Balfego Sari Nagusia jokatuko dute; Eusko Label ligakoek, berriz, Hondarribiko XXXVI. Bandera – Mapfre Sari Nagusia.
Bestetik, igandean KAE 1 eta KAE 2-koen txanda izango da; hurrenez hurren, Hondarribiko Arrantzaleen Kofradiako XVII. Bandera, eta Hondarribia Arraun Elkartea Bandera izango dituzte jokoan.
Euskotren liga
Hondarribiak ez du banderarik irabazi du denboraldi honetan, eta etxean irabazteko gogor egin beharko du borroka. Iazko emaitza lortzea dute helburu: bandera. Orain arte, etxean hiru bandera irabazi dituzte hondarribiarrek, eta laugarrena lortu nahi dute. Horrekin, bosgarren postutik, salbazioko laugarrenen artera igotzea lor dezake.
Hibaikak ere ez du banderarik irabazi ligan eta seigarren postuan dago, eta beheko postu horietatik igotzen saiatuko dira oreretarrak. Dena den, itsaso berdea lagun dutela esan daiteke, guztira, bi bandera irabazi dituztelako Hondarribian, eta hirugarrena eskuratzekotan, ur horretako bandera gehien dituenaren Hondarribiaren pare geldituko dira.
Eusko Label liga
Hondarribia bigarren da sailkapen nagusian, lehen postuan dagoen Urdaibairekiko puntu bakarreko aldearekin. Denboraldi honetan, bi bandera irabazi dituzte berdeek, eta etxekoa zazpigarren aldiz irabazteko itsasoratuko da Mikel Orbañanosen tropela. Urdaibairekin lehia estua espero da.
KAE 1
Sanpedrotarrak eta Sanjuandarrak, hurrenez hurren, bigarren eta hirugarren postuan daude. Postu horri eustea izango dute helburu nagusitzat, goiko postuei, alegia.
Aldiz, Hondarribiak lana du aurretik bere itsasoan. Bederatzigarren daude sailkapenean eta goiko postuetara igotzea komeni zaie berdeei.
KAE 2
Hibaika bosgarren postuan dago sailkapenean, 24 punturekin; San Juan, aldiz, seigarren 13 punturekin. Biek ala biek ahalik eta ondoen egitea izango dute helburua, puntuak batzen segitzeko gorako bidean.
Hona hemen bandera bakoitzaren eta egun osoko arraun festaren ordutegiak:
Arraun festak
Abuztuak 5, larunbata
- 11:00etan: Suzirien jaurtiketa.
- 11:00etan: Abiyuan fanfarrea hiriko kaleetatik ibiliko da.
- 12:30ean: Izugarria erraldoi eta buruhandien konpartsa Hondarribiko kaleetatik.
- 12:00etatik 14:00etara: Burrunba Elektrotxaranga San Pedro kalean.
- 16:45ean: Kalejira herrikoia zale guztientzat, San Pedro kaletik, estropada eremuraino.
- 17:25ean: XV. Txingudiko Bandera (Euskotren).
- 18:15ean: Hondarribiko XXXVI. Bandera (Eusko Label).
- 20:00etatik 22:00era: Abiyuan fanfarrea Portuan zehar.
- 20:00etatik 22:00era: Scoobyband orkestra San Pedro kalean zehar.
- 22:00etatik 01:00etara: DJ Kanupi Arrantzale auzoan.
Abuztuak 6, igandea
- 13:00etatik 15:00etara: Abiyuan fanfarrea Portuan zehar.
- 15:30ean: Hondarribia Arraun Elkartea Bandera (KAE 2).
- 16:30ean: Hondarribiko Arrantzaleen Konfradiako XVII. Bandera (KAE 1).
