Atlantikaldiko Itsas Elkarrizketek badituzte protagonistak
Nazioarteko eta Euskal Herriko artistak bat egiten duten Atlantikaldiaren proposamena da Itsas Elkarrizketa. Aurten, Nidia Gongora, Bia Ferreira, Rodrigo Cuevas, Azurmendi ahizpak edota Kimu Txalapartak hartuko dute parte.
Tantaz tanta jakinarazten ari dira aurtengo Atlantikaldiko egitaraua. Ekainean, esaterako, jaialdia irailaren 14tik 17ra egingo zela iragarri zuten, eta oholtza gainean izango diren zortzi artista nagusien berri ere eman zuten. Horiek lotura honetan kontsulta daitezke.
Oraingoan, bosgarren Itsas Elkarrizketa ekimeneko artisten berri eman dute. Asmoa da nazioarteko eta bertako sortzaileak taula gainean elkarrekin sortzen egotea, inoiz taularatu gabeko emanaldiak lehenengoz Atlantikaldiko publikoari eskainiz.
Emanaldi guztiak Agirrre Lehendakariaren plazan jarriko duten Itsasargi Nagusia eszenatokian egingo dira, irailaren 14tik 16ra.
Elkarrizketak
Femina, eta Bea eta Idoia Asurmendi ahizpak izango dira aurtengo Itsas Elkarrizketak hasiko dituztenak, irailaren 14an. Femina taldekoak, Sofia Trucco eta Clara Trucco Argentinatik iritsiko dira hip hop eta folk erritmoekin. Adibidez, 2019an Iggy Pop musikariarekin kolaboratu zuten haien Perlas y conchas diskoan.
Hurrengo egunean, irailaren 15ean, Aywa eta Kimu Txalarparta, eta Nidia Gongora eta Olaia Inziartek egingo dute bat. Batetik, Aywa eta Kimu Txalapartak eskainiko dute kontzertua, zeintzuek musika tradizionala lantzen duten. Txalaparta nahastuko dute Aywa taldeko kideek ekarriko dituzten Afrika iparraldeko rock eta jazz musikarekin.
Egun berean oholtzaratuko dira Olaia Inziarte baztandarra eta Nidia Gongora kolonbiarra. Gongora Kolonbiako Ozeano Bareko abeslaririk ezagunena da, adibidez, Shock Saria irabazi du eta Grammy Latino sarietara aukeratua izan zen 2019an folklore disko onenagatik. Inziartek, berriz, bere lehen lana kaleratu du Lehengo Lepotikan Burua eta jadanik Euskal Herriko txoko askotatik mugitu da.
Irailaren 16an, Bia Ferreirak eta Iban Nikolai hibridatuko dira. Bia Ferreira multi instrumentista, abeslaria, konpositorea, moldatzailea, musika ekoizlea eta aktibista da. Brasilgo Minas Geraisen jaio zen eta bere artea MMP gisa kontzeptualizatzen du: Musica de Mulher Preta (Emakume Beltzaren Musika). Bestetik, Nikolaik 25 urteko ibilbidea du atzetik digeriduarekin. Austaralian trebatu zen instrumentu horretan.
Egun berean, Rodrigo Cuevas, Hekthor folk eta Duplaren txanda izango da. Cuevasek bere azken lana La Romeria aurkezteko baliatuko du taula. Azken lan hau, Calle 13 taldeko Eduardo Cabrak ekoitzi dio, eta musika tradizionalaren aldarrikapen berritzailea da: dantzagarria, alaia eta epikoa.
Dupla talde euskaldunak musika urbanoa du doinu protagonista, ukitu elektronikoa zein hip-hop-a nahasten dituen pop musika dute marka. Bi disko ditu taldeak; lehena, 2019an kaleratu zuten Folklore, eta bigarrena, 2021an argitaratutako Nahieran.
Hekthor folk, bestalde, folk musikaria da eta instrumentu asko menperatzen ditu: panderoa, alboka, zerra, peñardoa edo pandero karratua eta handpana edota esku zartagina. Maurizia Aldeiturriaga panderojole eta abeslariaren irudian oinarritutako Aire! dokumentalean parte hartu du, edota erromerietan parte hartzen du.
