Aiton Borda eta udalaren arteko bilera, "emankorra"
Erabiltzaileekin bildu berri dira udal ordezkariak, haien kezka, zalantzak eta proposamenak entzuteko. Elkartearekin "harreman zuzena" izan nahi du udalak aurrerantzean.
![](https://oarsoaldea.hitza.eus/site/files/2023/08/aiton-bordan-bilera-egin-da2.jpeg)
Aiton Bordako zuzendaritza udaleko zenbait ordezkarirekin bildu berri da. Atzo egin zuten bilera hori, eta bertan izan ziren Mikel Arruti alkatea, Miren Ormazabal zinegotzia eta Dami Muñoz udal teknikaria.
Lehenik eta behin, egindako lan guztia eskertu zieten udaleko ordezkariek, “bai elkartearen barruan egiten dutena, baita herri bizitza indartuz, herriko kaleetan zehar egiten dutena ere”. Alkateak adierazi zuen “Lezoko altxorretako bat herri bizitza” dela, eta hori zaintzeko Aiton Bordakoek “lan handia” egiten dutela.
Elkartearekin harreman zuzena izan nahi du udalak aurrerantzean, eta horrelako bilera gehiago egiteko asmoa adierazi dute, “legealdian zehar beraien kezkak, zalantzak eta proposamenak entzutea funtsezkoa” baita udalarentzat.
Atzoko bileran ondorioztatu zutenez, Aiton Bordako taberna berriz irekitzeko asmoa dago, eta horretarako pleguak martxan jarriko ditu udalak. Taberna kudeatzeko herritarrak behar dituztela helarazi zuten ordezkari publikoek.
Egun, salmenta makina bat jartzeko eskera bideratzen ari da elkartea, bileran adieraziz zuten bezala, ez baitute bertan jateko edota edateko aukerarik. “Ideia ona iruditzen zaigu eta zenbait banatzaileekin hitz egingo dugu, beraien eskakizuna lehenbailehen martxan jartzeko aukerak aztertzeko”, erantsi zuen atzokoan alkateak.