Hirutik hiru Pasaia Kayakentzat
Urrezko domina bat, hirugarren postu bat eta taldekako sailkapeneko bigarren postu batekin bukatu dute Euskadiko Itsas Kayakeko XIX Koparen barruko itsas zeharkaldia.
Euskadiko Itsas Kayakeko XIX Koparen barruko itsas zeharkaldian parte hartu dute asteburu honetan Pasaia Kayakeko kirolariek, eta emaitza onekin itzuli dira herrira. Hirugarrenez jarraian, klubeko Aritz Araneta azkarrena izan da, hortaz, gizonezkoen senior kategoria nagusiko irabazle nagusi izendatu dute.
Bero handiko proba jokatu zuten palistek, eta Aranetak horrelako egoeretan ere primeran moldatzen dela erakutsi zuen. Bederatzi kilometro eta erdiko ibilbidea 43 minutu eta 18 segundoan zeharkatu zituen, urrezkoa eskuratuz.
Haren anai Antton Araneta ere ederki aritu zen, senior kategorian hirugarren postua eskuratu baitzuen. Honen eta gainerako taldekideek eskuratuko puntuei esker, taldekako bigarren postua lortu du Pasaia Kayakek.
Gipuzkoako Txapelketari begira jarri dira dagoeneko klubeko palistak, irailaren 2an jokatuko dute. Ondoren, Denian (Alacant) izango dute hurrengo hitzordua, bertan jokatuko den Espainiako Txapelketan.
