Etxetik urrun abiatu du denboraldi berria Kukaik
Abuztuko atsedenaldiaren ondoren, indartsu itzuli dira taldeko dantzariak. Nazioartean zenbait emanaldi eskaintzen ari dira egunotan.
'Yarin' emanaldiko irudi bat. Abuztua atseden hartzeko hilabetea izan dute Kukai dantza konpainiakoek, baina dagoeneko martxan dira, indartsu ekin diote 2023-2024 denboraldiari. Etxetik urrun hasi dute bira, nazioartean zenbait emanaldi eskaintzen ari baitira. Esaterako, hilaren 30era bitarte Jon Maya dantzari eta zuzendaria Kolonbian izango da, Arkaitz Miner musikariarekin batera. Nire Txokotik ikuskizuna taularatuko dute zenbait agertokitan. Sustraiak, jatorriak, bilaketa prozesuak eta beste hainbat gai lantzen dituzte hitzaldi formatuko emanaldi honetan.
Biratxo hau bukatu ondoren, Maya Yarin ikuskizuna eskaintzen ariko da Andres Marin dantzari flamenkoarekin eta Julen Achiary kantariarekin batera. Irailaren 16an Atlantikaldia jaialdian taularatuko dute, Torrekuako gunean. Irailaren 17an berriz, Miarritzeko Maitaldia jaialdian eskainiko dute.
Bira honek iraun bitartean Kukaiko beste zenbait kide Danimarkan dira, Waves festibalean hain zuzen. Topa ikuskizuna eskaintzen ari dira bertan, Brodas Bros dantza urbanoa egiten duen konpainia kataluniarrarekin batera.
Urtea bukatu bitarte, beste zenbait bidai egingo dituzte Kukaikoek, hala nola, Euskal Herriko beste udalerrietara, Pragara, Kanariar Uharteetara eta Erromara.
2024an, sorkuntza berria
Emanaldietatik harago, sorkuntza prozesu batean murgildu dira dantzariak, 2024rako ikuskizun berria estreinatuko dutela iragarri dute Proiektu “garrantzitsua” izango dela diote taldeko iturriek, eta datozen hilabeteotan “buru-belarri” jarriko direla horretan.
