Enrike Abril txapelketaren 60. ekitaldia asteburuan hasiko da
Sei taldek hartuko dute parte txapelketan, tartean Oiartzungo Txostek. Igandean Kapito Harri jasoko du Beheko Plazan.
Txosteko jokalari bat, iaz, Beheko Plazan [Arg.: gipuzkoapilota.eus]. 2023-2024 denboraldia Enrike Abril errebote txapelketarekin hasiko da. Sei taldek hartuko dute parte, tartean Oiartzungo Txost pilota elkarteak.
A multzoan arituko dira oiartzuarrak, eta ligaxkako partida guztiak Beheko Plazan jokatuko dituzte. Lehenengoa, igande honetan bertan —irailak 3— izango da, 10:30ean hasita.
Uztaritzeko Kapito Harri izango dute arerio estreinako partidan. Multzoa osatzen duen beste taldea ere Lapurdikoa da; zehazki, Donibane Lohizuneko Luzean taldea.
B multzoko hiru taldeak honakoak izango dira: Kanboko Kanboarrak, Amasa-Villabonako Behar Zana eta Zubieta.
Hiru jardunaldiak datozen hiru asteburuetan jokatuko dira. Multzo bakoitzeko lehen sailkatuak finalerdietara pasatuko dira zuzenean, eta bigarren eta hirugarren sailkatuek final-laurdenetan neurtu beharko dituzte indarrak finalerdietako beste txartelak lortzeko.
Eguraldiak ez badu baldintzatzen txapelketaren martxa, irailaren 24ko asteburuan izango dira ikusgai final-laurdenak eta urriaren 1ekoan finalerdiak.
Urriaren 8an jokatuko dute finala, Villabonako errebote plazan.
