Arditurriko parketxeak bi proposamen ditu irailerako
'Mineralen bila' arituko dira irailaren 10ean, Arditurri inguruan. Irailaren 24an Muniskuegañera joateko txangoa antolatu dute.
Arditurriko parketxeak ekitaldi pare bat antolatu ditu irailerako. Hil horren 10ean, meategi zenaren inguruan mineralak bilatzen arituko dira.
Meatzaritzak utzitako aztarnak ikustea izango da txangoaren helburua. Aurkitu, aztertu, eta toki berean utzi beharko dira. Izan ere, eremua natur-parkearen barruan dago.
Bi ordu iraungo ditu txangoak. 10:00etan hasiko da parketxearen ondotik, eta tokian bukatuko da 12:00etan. Euskaraz izango da.
Prezioari dagokionez, 12 urtetik gorakoek 6 euro ordaindu beharko dituzte, eta hortik beherakoek, 4.
Informazio gehiago behar duenak, 943 495 069 edo 688 895 068 telefono zenbakietara dei dezake, edo e-posta bidez harremanetan jarri.
Munieskugañara bisita
Hilaren 24rako Muniskuegañako multzo megalitikoa ezagutzeko aukera emango dute. Urnieta eta Hernani artean dago.
Luis Maria Zalduak gidatuko du ibilaldia, azalpenak euskaraz emanez. Arkeologia ondare handia biltzen du mendiak: hiru kromletx, zutarri bat…
Horrez gain, zuhaitz lepatuak edo saroiak ere erakutsiko ditu Zalduak. Izan ere, Urumeako zilegimendietan dago; lur komunalak ziren, abeltzaintza eta basogintzarako erabiltzen zirenak.
10:00etan aterako dira, Urnietako Besadegi parajetik. Hiru ordu eta erdi iraungo ditu ibilaldiak, eta ez du aparteko zailtasunik izango.
Izena aldez aurretik eman beharko dela jakinarazi dute. Horretarako 943 495 069 edo 688 895 068 telefono zenbakietara deitu beharko da, edo e-posta bidez harremanetan jarri.
