[Argazkiak] Koska bat gora egin du Hibaikak Kontxan
Egindako lanarekin eta lortutako emaitzarekin oso pozik azaldu da Zuriñe Alberdi Hibaikaren patroia. Gora egindako koska hori mantentzea dute helburu, eta batez ere gozatzea.
Hibaikako arraunlariak atzo Donostiara gerturatu zen Marea beltzarekin babesa eskertzeko. Poza zen nagusi atzo Kontxako lehen jardunaldia amaituta Haibaikako arraunlari eta zaleen artean. Bosgarren sailkatu ziren errenteriarrak, koska bat gora eginda eta EuskoTren Ligan zehar aurretik izan duen Hondarribiaren aurretik jarrita. Bi segundo pasatxokoa izan da tartea Hibaika eta Hondarribiaren artean, eta tarte horrek zapore gozoa du,zalantzarik ez da, Iñaki Mendizabalek entrenatzen duen eskifaiarentzat.
Estropada amaitu berritan egin zizkion adierazpenak Zuriñe Alberdi patroiak HITZAri, lortutako emaitzarekin eta egindako lanarekin pozik oso, “egindako lanarekin oso gustura gelditu gara eta orain emaitza ikusita oso pozik, gustura oso. Arraunlariak hustu egin dira, oso zentratuta atera gara eta estropada hasieratik bukaerara arte disfrutatu dugu”.
Datorren asteburura begira jarrita, helburu berarekin aterako dela Hibaika uretara nabarmen jarri zuen Alberdik, “bagenekien Oriok oso zaila jarriko zigula. Orio bandera bat irabaztera doa, gure helburua agian beste bat da, baina hasieratik saiatu gara Oriori aurrea hartzen, eta gaurko helburua hori bazen, datorren igandekoa bera izango da: tanda irabazi, burua hartu eta gozatzea”.
Poza eta besarkadak uretatik atera zirenean, baita zaleen babesa eta txaloak ere. Pena, ez zirela atzokoan ere portuko arrapalatik atera —sailkapen estropadan ere ez ziren bertatik irten uretatik— garabiarekin baizik. Halere, zaleek kanpoaldean zituzten zain zoriondu eta txalo artean hartzeko arraunlariak. Zaleei ere eman zizkieten eskerrak Hibaikako emakumeek: argazkia egin zuten Kontxara eurak animatzera gerturatu zirenekin. Hori arraunlariek, fin animatzen dituen marea beltzari egindako aitortza.
Indarrak eta arreta osoa orain, Kontxako bigarren jardunaldiari begira jarrita ditu Hibaikak. Helburua lan eta esfortzu handiarekin gora egindako koska hori mantentzea, eta batez ere, pasio duten arraunarekin gozatzea.
Hemen klik eginda atzoko sailkapena.
