Eguzkik alegazioak egiteko epea luzatzeko eskatu du
Eusko Jaurlaritzako Ingurumenaren Kalitatearen eta Ekonomia Zirkularraren Zuzendaritzari luzatu dio eskaera hori Eguzki taldeak.
Papresaren jardueragatiko zarata eta soinuengatik kexa eta erreklamazio ugari egiten jarraitzen dute bizilagunek. Argazkia: Wikimedia Eguzki taldeak alegazioak egoki prestatzeko nahikoa denbora bermatu dezan eskatu dio Eusko Jaurlaritzaren Ingurumenaren Kalitatearen eta Ekonomia Zirkularraren Zuzendaritzari. Papresaren jardunari lotuta dator eskaera. Izan ere, enpresa horrek aurten bere instalazioak aldatzeko izapide bat hasi duela ekarri du gogora Eguzkik, “prozedurarik zorrotzenari lotuta”. Eguzkik azaldu duenaren arabera, prozedura horrek ingurumen eraginaren ebaluazioa (IEA) egitera behartzen du, eta aukera ematen die elkarteei eta norbanakoei espedientean parte hartzeko.
Hala ere Ingurumenaren Kalitatearen eta Ekonomia Zirkularraren Zuzendaritzak alegazioak aurkezteko epea 30 balioduneko mugatu izanak, gaia egoki lantzeko aukera murriztu duela dio talde ekologistak: “Oso zabala da espedientea osatzen duen dokumentazioa, zailtasun teknikoak ditu, eta opor garaian, abuztua-iraila artean zabaldu du epea alegazioak aurkezteko”. Eguzkik desadostasuna azaldu du erabakiarekiko, baita salatu ere, eta alegazioak behar bezala prestatu ahal izateko epea luzatzeko eskatu du.
Honakoa ez dela Papresak aurkeztutako izapide bakarra ere esan du Eguzkik: “2018 eta 2022 arteko epe laburrean, bere instalazioak aldatzeko hiru eskaera egin ditu administrazio eskudunarekin. Horrela egitea, aldaketa orokor gisa egin beharrean, legeari iseka egiteko ahalegin gisa uler daiteke. Izan ere, zatikatua eginda, ingurumenaren ikuspegitik eta pertsonen osasunerako izapide zorrotzagoak saihesteko”.
