Marokoko herria laguntzeko, arropa eta diru bilketa
Ostiral arratsaldean pasa behar dute Iztietako meskitatik elkartasun keinua egin nahi dutenek. Arropa kaxa itxietan eraman behar da.
Iztietako Oiartzun kaleko meskitan utzi bear dira gaiak. Irailaren 9ko goizaldean lurrikara izan zen Marokoko erdialdean. Batez ere Atlas mendilerroaren inguruko herri txikiek izan dituzte kalte gehienak. Hildako asko ere eragin ditu lurraren mugimendu bortitzak, azken datuen arabera 2.800 inguru. Laguntza behar dute Marokon. Horri erantzuna emateko, Errenteria-Oreretako marokoarren komunitateak arropa eta diru bilketa antolatu du hilaren 15erako (ostirala).
Elkartasun keinua bideratu dutenek azaldu dute arropa kaxa itxietan eraman behar dela. Lau eratako kaxak egin behar dira: nesken arroparena, mutilen arroparena, emakumeen arroparena, eta gizonen arroparena. Kaxa bakoitzak arropa norentzat den izan behar du markatuta. Bestalde, diru ekarpenak elikagaiak erosteko izango direla jakinarazi dute, Marokon bertan. Diruaren zati bat garraio gastuetarako bideratuko da.
Ostiralean, 18:00etatik 21:00etara izango dira elkartasun keinua egin nahi dutenen zain Iztietako meskitan (Oiartzun kalea, 12).
