Udazkenean, Olinpiadak Aiton Bordan
Urri eta azaro bitartean hainbat jolas egiteko aukera izango dute Lezoko erretiratuek. Irabazleen sari banaketa, abenduan.
Lezoko Aiton Bordan udazken gozoa izango dute. Olinpiadak antolatu ditu bertako zuzendaritza batzordeak herriko erretiratuentzat, urri eta azaroan izango direnak. Abenduan, bukaerako ekitaldia: herri bazkaria eta sari ematea. Hilaren 19tik 29ra eman behar dute izena horietan parte hartu nahi dutenek elkartearen egoitzan, astearte eta ostegunetan, 10:00etatik 11:30era. Behin izen emateak itxita, batzar orokorra egingo dute olinpiaden nondik norakoen berri emateko: urriaren 9an da, 18:00etan, Aiton Bordan.
Emakumeentzat, gizonentzat eta bikoteentzat (mistoak) jokoak izango dira olinpiadetan. Emakumeenak bingoa, dominoa, eta eskoba dira. Gizonenak musa eta tutea. Bikote mistoentzat, berriz, toka eta igel jokoak.
Jolasen aroa bukatuta, sari banaketa abenduaren 11tik 17rako tartean egingo dutela jakinarazi dute.
Irteerak
Olinpiadez gain, Aiton Bordako udazkena indartsu dator. Bi irteeraren berri eman dute.
Lehena hilaren 29an egingo dute, Bizkaira. 08:30ean aterako dira Lezotik, eta Gernikan egingo dute lehen geldialdia hango Bakearen Museoa bisitatzeko. Ondoren, Bermeora joango dira, eta hango kasinoan bazkalduko dute. Bazkalostean Lekeitio ezagutzera joango dira, 20:30ak aldera Lezora itzultzeko. Bidaiaren prezioa 30 eurokoa da, eta Aiton Bordan jarri dute jada zerrenda.
Bigarrena urriaren 27rako prestatu dute, Nafarroara oraingoan. Elizondora joango dira lehenik hango ganadu eta baserrietarako makinaria azoka ezagutzera. Ondoren, Doneztebeko Santamaria jatetxean bazkalduko dute. 19:30ean dira herrira bueltan.
