Pasaiako udal euskaltegian guztiz doan ikas daiteke euskara
Izena emateko epea zabalik izango da hilaren 20ra arte. Udalaren finantziazioari esker, kolektibo zaurgarrienei diru guztia itzuliko zaie.
Udal euskaltegiko arduradunak eta, erdian, Laura Re, Euskara zinegotzia. 
Zabalik da Pasaiako udal euskaltegian izena emateko epea, eta hala mantenduko da hilaren 20ra bitarte. Aurtengo kanpaina Euskara, bidaia harrigarria lelopean abiatu dute Trintxerpeko euskararen gunean.
Euskaltegian A1etik C1era bitarteko mailetan eman dezakete izena 16 urtetik gorakoek. Talde bat baino gehiago daude maila bakoitzean, ahalik eta ikasle gehienen ordutegietara moldatu ahal izateko: 07:00etatik 21:00ak arte dago zabalik euskara ikasteko zentroa. Txandaka lan egiten dutenek ere euskaltegira goizez nahiz arratsaldez joateko aukera dutela ohartarazi dute.
Klaseak
Saio gehienak egunean bi ordukoak izaten dira, baina beste aukera batzuk ere badira. Besteak beste, 12 urtetik beherako seme-alabak dituzten gurasoek euskara eskolak seme-alaben ikastetxean bertan jaso ahalko dituzte. Era berean, merkatari, erretiratu edo ahozko praktika landu nahi duten guztiek mintza praktika taldeetan eman ahalko dute izena, ahozkoan zentratzeko.
Doako ikastaro trinkoak ere badira langabezian dauden eta euskara ikasteko goiz osoa duten pasaitarrentzat. Kontrako kasuan, klaseetara modu erregularrean joaterik ez dutenentzat, autoikaskuntza sistema martxan da. Horri esker ikasle bakoitzaren erritmoari eta beharrei egokitutako zerbitzua eskainiko dute euskaltegiko irakasleek. Bakarkako lana da azken hori, tutore baten gidaritzapean egin beharrekoa.
Zerbitzuak eta finantziazioa
Modulu guztiak egokituta daude euskara ikasten hasi, ziurtagiriren bat egiaztatu (HABE, IRALE, IVAP…) edo maila hobetu nahi duten ikasleek horretarako aukera izan dezaten. Eskolen osagarri, beste jarduera batzuk ere egiten dituzte euskaltegiaren barruan nahiz kanpoan: tailerrak, solasaldiak, bisitak, txangoak, mintzalaguna…
Pasaiako Udalak laguntza ekonomikoko lerroak zabalik ditu euskara ikasi nahi duten kolektibo zaurgarrienentzat. Kasu, enplegurik gabeko pertsonek, 16-30 urte bitarteko gazteek eta hasierako mailetan matrikulatzen diren pasaitarrek (A0A0/A1A0) matrikularen %20 besterik ez dute ordainduko; gainerako %80 udalak aurreratuko du. Horrez gain, 12 urtetik beherako seme-alabak Pasaiako ikastetxeren batean matrikulatuta dituzten edo Pasaian erroldatuta dauden gurasoek matrikula murriztua izango dute.
Kolektibo horietako ikasleak eskolen %85era bertaratzen badira, ikasturtea bukatzean matrikularen %100 itzuliko die udalak. Gainerako ikasleek ere, baldin eta Pasaian erroldatuta badaude eta asistentziaren baldintza betetzen badute, %75eko laguntza jasoko dute ikasturtearen amaieran.
Informazio gehiago jaso edo izena eman nahi duenak euskaltegira jo dezake (Euskadi Etorbidea 61, anbulatorioaren ondoan) 08:00etatik 19:00etara, edo 943 00 43 40 telefono zenbakira deitu. Azken aukera, posta elektroniko bidez mezua bidaltzea.
