Euskal Herritik Galiziara bidaia musikala EMKE Bandarekin
Errenteriako Musika Banda eta Gipuzkoako Galiziako Etxeko gaitero taldea eskutik datoz Atlantikaldira.
Musika Banda Madalen Eguneko kontzertuan. Errenteriako Musika Bandak Atlantikaldia: Bi lurralde hizkuntza bat kontzertua eskainiko du. Larunbatean izango da hori, 12:30ean Herriko Plazan. Ez da bakarrik ariko, Euskal Herria eta Galizia batuko dituen musika bidaian, Gipuzkoako Galiziako Etxeko Gaiteroak hartuko dute-eta parte. Alain Aierdi Gurpegik zuzenduta Suite Galaicaren harmonia, erritmoa eta doinuak txertatuko ditu musika bandak bere emanaldian. Obra horrek bigarren mugimenduan queimadaren konjurua biltzen du, eta horri keinu eginez zuzenean prestatuko dute queimada eta bertaratutako guztiek dastatzeko aukera izango dute.
Denboraldiko bigarren zatiari helduko dio musika bandak Atlantikaldian egingo duen emanaldiarekin. Larunbatekoa, espazio eszeniko eta akustiko ezin hobean egingo dute.
