Odola ematen dutenei, esker ona
Inoizko pertsona kopururik handienak eman zuen odola hilaren 5ean: 100 lagun izan ziren, eta ia erdiak, euskara hutsean egin zuen prozedura.
lau Haizetara Euskaltzaleon Topaguneko kideak, odol emate saioaren ostean. Esker on mezua helarazi die Lau Haizetara Euskaltzaleon Topaguneak odola ematen duten pertsonei. Esker ona, erakusten duten konpromisoarengatik, eta keinu txiki horren bidez bizitzak salbatzen ari direlako. Euskaltzaleon topaguneak, 2018an hartu zuen bere gain odola emateko saioak antolatzeko ardura udalerrian: “Gure herria gizarte aktibazioaren eredu izan dadin lan egin dugu, alderdi askotan. Horietako bat odol-emateak dira”.
Horretan hasi zirenean, erronka bat ere jarri zuen topaguneak: hilero, herritarren 0,4ak odola ematea lortzea. Kopuru hori gomendatzen dute osasun arduradunek egoera normalizatu gisa. Errenteria-Oreretaren kasuan 160 pertsonek eman behar dute odola hilero egoera normalizatu hori bermatzeko. Ez dira oraindik datu horretara heldu, baina bidea egiten ari dira zalantzarik gabe, eta hilaren 5ean inoizko odol-emate kopururik handiena lortu zuten. “100 pertsona joan ginen odola ematera, inoiz ez zen kopuru hain alturik lortu herrian. Bestalde, odol emaileen %22 30 urtetik beherakoa izan zen, eta joandakoen %43k euskaraz egin zuen prozedura”.
Lau Haizetara Euskaltzaleon Topagunearentzat, datu horiek agerian utzi dute “gizarte arduratsuago baterako bidea posible izatearekin batera, ezinbestekoa dela. Badu egin beharreko bide bat eta lortu beharreko helburu bat, Aukerak sortzen. Haizea izan proiektuak pertsonak garapen objektu izatetik garapen subjektu izatera eraman nahi ditu”.
Topaguneak herritar guztiak gonbidatu ditu “erronka zoragarri” horretan parte hartzera. Odola emateko hurrengo hitzordua gogora ekarri du horretarako: urriaren 3an izango da —hileko lehen asteartean da beti— Merkatuzarren. Parte hartu nahi duen orok 688 76 53 98 telefono zenbakira deitu behar du hitzordua hartzeko, “ez dezagun ahaztu bizitzak salbatzen ari garela”.
