[Bideoa eta argazkiak] Herri dira
Une hunkigarria utzi zuten atzo Lezoko elkarteetako danborradek Gurutze Santuaren plazan.
Lezoko danbor festaren irudi bat. Atzo hasi ziren santakrutzak, eta atzo bertan izan zuten lezoarrek jai egitarauaren barruko ekitaldirik hunkigarri eta politenetako bat. Udalerriko lau danborradek, danbor hotsez, dantza eta alaitasunez bete zituzten kaleak, erruz. Puntual azaldu ziren denak hitzordura, Tiñelu, Ixkulin, Altzate eta Allerru, eta fin aritu ziren danbor eta barril jotzaileak, bazterretan festa gosez ziren lezoarrak dantzan jarriz.
Gauerdian, ordu magikoarekin batera heldu zen une magikoa ere. Bat egiten dute herriko kaleetan bakoitzak bere ibilbidea egin ostean, Lezoko elkarteetako danborradek, Gurutze Santuaren plazan. Zain zituzten herritar mordoa. Une hori hunkigarria izaten bada berez, atzo are hunkigarriago bilakatu zen. Banan-banan hartu zuten lekua danborradek, eta udaletxeko balkoira igo ziren lau danborradetako kantinera eta kantineroak, baita banderadunak ere.
Udaletxeko balkoian zen Mikel Arruti alkatea, baita udal ordezkari gehientsuenak ere. Hitza hartu zuen Arrutik herritarrei zuzentzeko; gidoirik gabe, bihotzetik mintzatu zitzaien. Hiru mezu zabaldu zituen Arrutik. Etxetik eta herritik kanpo direnak izan zituen gogoan lehenik alkateak, eta plazan bildutako danbor eta barril joleen burrunbak plaza bete zuen. Bigarrenik, herri izaera jarri zuen nabarmen eta horrek duen garrantziari erreferentzia egin, izaerak egiten duelako herri. Hirugarrenik, erasorik gabeko jaien aldeko aldarria egin zuen udal agintariak, indarkeria matxistarik gabeko Lezo helburu.
Ez zuen hor amaitu, plazara bildutako danborradetako kideei eta herritarrei besarkatzeko eskatu zien, sorbaldatik heltzeko, eta hala zirela Mikel Laboa handiaren Txoria txori kantaren lehen doinuak Arrutik berak bota zituen balkoitik. Ahots bakarra bihurtu zen plaza une horretan, ahots bakarra, eta herri bat. Atzokoa aurtengo santakrutzetako unerik ederrena ez bada, ederrenetakoa izango den zalantzarik ez da. Zalantzarik ez da, herri direla.
- 10:00. Diana Munttar Txistulari Taldearekin.
- 10:00-13:00. Gurpilen gaineko zirkuitua haurrentzat Saldise plazan.
- 11:00. Meza Nagusia Santo Kristo elizan.
- 12:00. Herri kirolak Gurutze Santuaren plazan. Aizkolariak: Iker Vicente, Eneko Saralegi, Julen Alberdi eta Ugaitz Mugerza. Harri jasotzailea: Mikel Mugerza.
- 12:00. Erraldoi eta buruhandiak.
- 12:30. ‘i-14’ eguneko topaketa Kale Nagusian, Txirbilla Sound Systemekin.
- 14:00. Erretiratuen bazkaria Etxeberri jatetxean.
- 14:30. ‘i-14’ egunaren txupinazoa Gurutze Santuaren plazan.
- 15:00. Arrantzaleen eta Tartekoen bazkaria Herri Eskolako jolastokian.
- 17:00. Haurrentzako puzgarriak Goiko plazan.
- 17:30. Josetxo Etxandi XLVII. Oroitaldiko federatuen finalak Koldobide Gezala pilotalekuan.
- 18:00. Erraldoi eta buruhandiak.
- 18:30. Herri Eskolako jolastokitik hasita, Jaixkipe txarangarekin kalejira.
- 20:30- Karlos Saldise plazan, DJ Bull.
- 22:00. Zezen suzkoa Gurutze Santuaren plazan.
