Itsasoan zein ibaian, handienak
Hibaikak Euskotren Ligan lehiatzen jarraituko du, Portugaleteko estropada ere irabazita.
Hibaikako arraunlariak gaurko estropada eta Euskotren Ligarako txartela irabazi ostean. Argazkia: Iñaki Nogueira 'Goral' Handiak dira oso. Gaur argi utzi du Hibaikak Euskotren Ligan merezimendu osoz dagoela. Atzoko estropada amaitutakoan, Iñaki Mendizabalek esan zuen gaurko jardunaldian zerotik abiatuko zirela eta oinak lurrean zituztela; hala joan dira eta jokoan zen txartela bakarra errenteriarrek poltsikoratu dute.
Ez da erraza izan gaurko estropada ere, handia zen korrontea eta Zuriñe Alberdi patroiak arazoak izan ditu estatxarekin erlojupekoan txanda heldu zaienean. Azkar aski eman dio buelta egoerari eta dena eman dute, orain arte bezala estropadarik onena egiteko. Lehen luzean oso berdinduta joan dira Hibaika eta Zumaia, eta denbora bera zuten ziaboga egiteko unean; bueltako luzea baina azkarrago egin dute errenteriarrek. Pozik Madalen ontzikoak, eta pozik haien zaleak, emakumeen arraunaren gorenean jarraituko dutelako Iñaki Mendizabalek entrenatzen dituen emakumeak.
Alberdik berak egindako adierazpenetan argi esan du, ez zutela uste play-offa jokatu behar zutenik, “halere, etorri gara, bi jardunaldietan arraun egin dugu eta erakutsi Euskotren ligan merezimendu osoz ari garela”. Zalantzarik ez zen kanporaketa jokatu aurretik, eta kanporaketako bi estropadetan berretsi egin dute itsasoan zein ibaian handiak direla.
Ospatzea dagokie orain, Alberdik berak esan duenez. Atlantikaldiak azken eguna du gaur Errenteria-Oreretan eta oholtzaz josita da udalerria horren harira, agian bateren batean tartea izango dute Errenteria-Oreretaren izena berriz ere gorenera eraman duten emakumeek.
