Azart teatro-barkuaren abenturak San Pedron aurkeztuko dituzte
Pasaian hiru urte eman zituen barkuari buruzko dokumentala ondu dute Masha Novikova eta Annike Kaljouw zuzendariek. Igandean emango dute.
1989an ekin zion Azart teatro-barkuak Europako dozenaka portu zeharkatzeari. Tripulatzaileek “izpiritu librearen enbaxadore” gisa deskribatu izan dute euren burua, eta lema horrekin hamarkadak eman dituzte batetik bestera barreiatzen euren antzezlan satirikoak.
Barkua Pasaiako portuan egon zen amarratuta 2012-2015 urte bitartean. Hiru urte horietan zehar, larunbatero eskaini zizkieten bizilagunei euren kabaret, kontzertu eta orotariko performanceak. Barkuko artistekin batera aritu ziren, halaber, hainbat artista autoktono ere.
Masha Novikova eta Annike Kaljouw zinema zuzendariek dokumental bat ondu dute barku horren abentura artistikoaren berri emateko asmoz. AZART, Come make art izenpean aurkeztu duten ikus-entzunezkoan bildu dituzte belaontziaren 30 urtetako joan-etorriak.
Obra San Pedron aurkeztuko dute, bertako jai txikiekin bat eginez, datorren asteburuan. Zehazki, San Pedroko frontoian izango da proiekzioa —kaleko zinema, beraz—, datorren igandean, 20:30ean.
