Patinetako maratoirik gogorrenean, gustura
Jon Arrizabalaga eta Julen Mariñelarena antxotarrek hamargarrenez parte hartu dute Iruñea eta Gares lotzen dituen rollerren maratoian.
Jon Arrizabalaga eta Julen Mariñelarena, P2P maratoian elastiko ofizialekin. Patinen edo rollerren munduan bada sona berezia duen proba: P2p Iruñea-Zubia lehiaketa. Maratoia da (42 kilometro eta 195 metrokoa), eta adituek diotenez, kirol modalitate horretan dauden eder eta gogorrena da. Joan den igandean izan zen Iruñean hasi eta Garesen bukatzen den proba, eta bertan bi antxotarrek parte hartu zuten: Jon Arrizabalagak eta Julen Mariñelarenak. Lehia horren XIV. ekitaldia izan zen igandekoa.
Bi kirolariek euren esperientzia eta poztasuna partekatzeko desioa izan dute, hainbat arrazoirengatik. Batetik, hamargarrenez parte hartu dutelako roller lasterketa berezi horretan, eta bestetik, aurtengoan gonbidatu berezia izan dutelako 42.195 metroko bidean: haize latza. “Berez gogorra bada ere, aurten gogorragoa izan da. 190 kirolarik bukatu dute proba”, zehaztu dute antxotarrek. Aurretiko izen emate datuen arabera, partaideen zerrenda 400dik gorakoa zen.
Pozik daude egindakoarekin, gustura. Ez da nolanahikoa gisa horretako maratoi batean hamargarrenez izatea, are gehiago, kontuan hartuz igandean izan zituzten eguraldi baldintzak. Edonola ere, hurrengo urtean han izateko prest azaldu dira, herri mailako kirolariek ere gozatzen dutelako ahaleginean, eta lagun giroan.
