Dantzak eta festak aldaketak eragingo dituzte trafikoan
Pasaiako Udaltzaingoak datorren asteburuan izango diren egokitzapenen berri eman du. Antxo eta Donibaneko bizilagunei eragingo diete horiek.
Mimos tabernaren inguruan izango dira trafiko aldaketa nagusiak Antxon. 
Datorren asteburuan zenbait trafiko aldaketa izango dira Donibane eta Antxon. Batetik, San Fermin Txikiak ospatuko dituzte barruti gorriko bizilagunek, eta festen ondorioz, zenbait trafiko aldaketa izango dira ostiraletik igandera. Horien nahiz Donibanekoen berri eman du Pasaiako Udaltzaingoak.
Antxori dagokionez, Gure Zumardia kalea itxita egongo da 5. eta 13. zenbakien artean (Mimos taberna) ostiraleko 16:30etik igandeko 24:00ak arte. Horrez gain, Gelasio Aranbururako sarbidea, 1. zenbakitik 5-A zenbakira, Nafarroa etorbidetik egingo da, eta ohiko irteera mantenduko da Blas de Lezotik. Beraz, Gelasio Aranburu kalea, Blas de Lezoko bidegurutzetik, bi norabideko tarte bihurtuko da.
Donibaneren kasuan, Muxikoek euren dantza saioa egin ahal izateko, Santiago plaza ibilgailuentzako itxita egongo da larunbatean, 11:30etik 13:45era. Udaltzaingoak ohartarazi du euria egingo balu, dantza emanaldia Donibaneko frontoira lekualdatuko luketela, eta kasu horretan ez litzatekeela trafikoan eraginik izango.
