Lezo eta Kaputxinoen arteko zatiari bidegorri izendapena kentzeko eskatu du Eguzkik
Bide segurtasun arazoak direla salatu dute eta bidegorri izendatzeko baldintzak ez direla betetzen talde ekologistak.
Baldintzak ez dituelako betetzen bidegorri izendapena kentzeko eskatu du Eguzkik. Argazkia: Eguzki Talde Ekologista Eguzki talde ekologistak arreta jarri du Bizikleta Bideen Lurralde Plan sektorialeko I.1 ibilbideko Gi-636 errepidean. Lezoko biribilgunea eta Kaputxinoetako biribilgunearen artean “bide segurtasun arazo larria” dagoela esan du Eguzkik: “Aipatu zati horretan aldi bereko oinezkoentzako eta bizikletentzako eremua dela dion seinalea jarri berri dute, baina oso estua da eta, hori gutxi balitz, oinezkoen zein bizikleten zirkulazio segurua eragozten duen hainbat elementu daude”.
Agirietara jo du Eguzkik baieztapena egiteko. Zehazki, Bidegorria diseinatzeko, eraikitzeko, azpiegituratzeko, seinaleztatzeko, balizatzeko, kontserbatzeko eta mantentzeko gomendioen eskuliburua eta Gipuzkoako bizikleta bideen Lurraldearen arloko Plana hartu ditu oinarri.
Horrenbestez Ingurumen Aholku Batzordeari eskaera egin dio talde ekologistak, “Errenteriako Udalari aldundira jo dezala eskatzeko galdegin diogu batzorde horri, bidegorri izendapena eta seinaleak kentzeko. Zabalera handitu, argiak jarri eta galtzadako sastrakak garbitu eta kendu ditzan eskatzea ere galdegin diogu, zorua mantendu era pasabidea oztopatzen duten trafiko seinaleak kentzearekin batera”.
Beste bidea, bide segurtasun arauak eta gomendioak bermatuko dituen beste bide hartzea dela esan du Eguzkik.
