Albaola, Loiren izar
Europako ibai festibal garrantzitsuenaren ohorezko gonbidatu da Pasaiako Itsas Kultur Faktoria, Frantziako Orleans herrian. Igandera arte izango dira han.
Xabier Agote, atzo, festibalaren inaugurazioan Orleanseko eta Quebec-eko kideekin. Albaola Loireko Festibaleko ohorezko gonbidatu da. Europako ibai festibalik garrantzitsuenetakoa da Frantziako Orleans herrian egiten dena, eta bertan, ondare balioa duten ontzien topaketa egiten dute “Albaolarentzat sekulako ohorea da izendapen hau”, esan dute. Nazioarteko ospakizun horren 11 ekitaldi atzo hasi zen, eta igandera arte luzatuko da. Milioi erdi bisitari espero dituzte han egunotan. “Gainera, Festival de Loire-rekin partekatzen ditugun balore eta helburuak direla eta, erakusleiho ezin hobea izango da Pasaia Itsas Festibala bisitarien, marinelen eta bertan parte hartuko duten kultur eragileen artean sustatzeko”, esan dute Pasaiako itsas faktoriako kideek. Loire ibaiak 1.000 kilometro pasatxoko bidea egiten du Frantziatik.
Atzo, Xabier Agote Albaolako presidenteak, Nathalie Genest Quebec-ek Parisen duen Ordezkari Nagusiarekin, eta Serge Grouard Orleanseko alkatearekin batera, hasiera eman zioten ondarez eta altxor kulturalez betetako ekitaldi jendetsu horri. “Datozen egunetako eginkizunari behar bezalako erantzuna eman eta jasotako errekonozimenduaren mailan egoteko, Albaolako 22 lagun joan dira Orleansera eta uretan zein lehorrean parte hartuko dute”, jakinarazi dute Itsas KUltur Faktoriako kideek. Red Bayn (Kanada) San Juan baleontziaren azpian aurkitu zuten balea txaluparen erreplikaz gain, Albaolako beste hainbat ontzik ere nabigatuko dute Loireko uretan, Ameriketatik traineruak eta Basanoaga batel handiak.
Izan ere, Albaolak beste herrialde bateko ordezkaritza bat aukeratu du Loireko festibalean izateko: Kanadako San Lorenzo. “Horregatik, Albaola izango da, Kanadako San Lorenzo ibaiaren estuarioko ibai-ondarearen ordezkari gisa parte hartuko duena. Bere balea txalupekin egingo du, euskaldunek XVI. mendean beren uretan nabigatzeko erabiltzen zituztenen erreplikekin hain zuzen ere”.
Gainera, Euskal Herria eta Kanadaren artean zubiak eraikitzen dituzte bi erakusketa izanen dira ikusgai Orleansen: bat, Ternuan euskaldunek izan zuten presentzia azaltzen duena; eta bestea, Albaolan San Juan baleontzia eraikitzeko prozesuari buruzkoa. Lehorrean, beste balea txalupa bat ere izango da ikusgai, bai eta halako txalupa baten saihetsak ere. Horrekin batera, ontzigintza tradizionalarekin lotura duten lanbideen zuzeneko erakustaldiak eskainiko dituzte, hala nola, sokagintzakoak, poleagintzakoak eta errementaritzakoa. Festibala amaitu baina lehen, irailaren 23an, Xabier Agote, Albaolako presidenteak hitzaldi bat emango du Orleansen.
