Barbado eta Zelaiaren aldeko elkartasun argazkira deitu dute
Espetxeratzeko agindua jaso dute Galder Barbado eta Aitor Zelaia gazte arabarrek. Babes keinua egingo dute antxotarrek gaur.
Galder Barbado eta Aitor Zelaia. Deialdia egiteko erabilitako argazkia. 
Galder Barbado eta Aitor Zelaia gazte arabarren aldeko elkartasun argazkia egingo dute gaur arratsaldean Pasai Antxon. Ankerkeriari Stop plataformak deituta elkartuko dira bizilagunak Biteri plazan, 20:15ean.
Joan den astean jakinarazi zuen plataforma horrek espetxeratzeko agindua jaso dutela bi gazteek, eta jakinarazpen hori egin zenetik hamar eguneko epea eman dietela borondatez espetxeratzeko. Hori egin ezean, Espainiako Auzitegi Gorenak atxilotze agindua martxaraziko du, lau urteko kartzela zigorra betearazteko.
2021ean ezarri zien bi gazteei kondena hori Auzitegi Nazionalak, munizio eta armak gordetzea leporatuta.
