Kultur eragileek diru laguntzak eska ditzakete Pasaiako Udalean
Gehienez ere 25.000 euro banatuko ditu udalak erakunde publiko edo pribatuen artean. Eskaerak aurkezteko epea urriaren 23ra arte da zabalik.
Pasaiako kultur programetarako diru laguntzen deialdia atzo, hilak 21, argitaratu zen Gipuzkoako Aldizkari Ofizialean (GAO). Hori horrela izanik, eskaerak aurkezteko epea zabalik da, eta hala mantenduko da urriaren 23ra bitarte.
Laguntzen onuradunak Pasaiako udalerrian egoitza duten irabazi asmorik gabeko erakunde publiko edo pribatuak izan daitezke. Egoitza soziala Pasaian ez duten erakundeek ere egin ahalko dute eskaera, betiere udalerriaren intereserako jarduerak garatzen badituzte.
Bi motatako egitasmoak bultzatuko ditu udalak: urteko jarduerak eta ezohiko jarduerak. Udalak ezohikotzat joko ditu aparteko izaera izateagatik urteko programazioa zehaztutakoan aurreikusi ez direnak. Edozein kasutan, emango diren laguntza guztien batura gehienez ere 25.000 eurokoa izango da.
Eskaerak nola aurkeztu
Udalak ohartarazi du eskaerak ezingo direla aurrez aurre HAZ bulegoetan aurkeztu, eta online soilik egin ahalko direla horiek. Horretarako, interesdunek udalaren webgunera jo dezakete, eskaera orria bete eta dagokion sailari helarazteko. Bertan irakur daitezke, halaber, deialdiaren oinarri zehatzak.
Zalantzak argitzeko, HAZeko bulegoetara deitu (943 34 40 34, luzapena 915) edo Kultura eta Hezkuntza Sailarekin harremanetan jar daitezke herritarrak posta elektroniko bidez.
