Garagardo Festa, hilaren 28tik 30era
Hiru egunez luzatuko da Tiñeluren Garagardo Festa. 18:00etan zabalduko dute egunero Karlos Saldiseko gunea.
Aurten ere ez du hutsik egingo Lezoko Garagardo Festak. Tiñelu elkartearen ardurapean antolatzen den festak baditu datak: hilaren 28tik (osteguna) 30era arteko bidea egingo du aparraren zaleen topaguneak. Beti bezala, gune nagusia Karlos Saldise plaza izango da. Edariaz eta jakiez bapo gozatzeaz gain, bestelako jarduerekin osatu dute egun horietako egitaraua antolatzaileek. Lezoko Udalaren laguntza du festak. Txandetan parte hartu nahi dutenek Tiñelun eman behar dute izena.
Hiru egun horietan 18:00etan zabalduko dituzte txorrotak. Hala, lehen egunerako, Orlis Pineda kantautore kubatarraren emanaldia prestatu dute 22:30ean igoko da Saldiseko oholtzara. Hilaren 29an, berriz, Jaixkipe txarangaren ardurapean geldituko da gunea girotzea, 23:00etatik aurrera hasiko baitira euren piezak jotzen. Azken egunean, hilaren 30ean (larunbata), 22:15ean Traband taldearen emanaldia hasiko da, eta gauerditik aurrera Xala eta Garaziren esku musikarekin tragoskak laguntzea.
