Udal zerga ordenantzei ekarpena egin die PSE-EEk
Sozialistek proposatutako hiru neurri txertatu dituzte proposamenean. Udal zerga eta tasen balizko igoera, ordea, orokorra gaitzetsi dute.
Joxean Sanchez, Lezoko PSE-EEren eleduna. Lezoko PSE-EEren udal taldeak jakinarazi duenez, udal zerga ordenantzen proiektua hobetzea lortu du, horietan hiru zuzenketa txertatzearen bidez. Honako dira onartutako hiru neurriak: Ondasun Higiezinen gaineko Zergaren (OHZ) hobaria etxebizitza bat alokairuan jartzen dutenentzat (Eusko Jaurlaritzaren bitartez); zerga ordenantzak hizkuntza inklusibora eta ez-matxistara egokitzea,;eta Eraikuntza, Instalazio eta Obren gaineko Zergaren (EIOZ) %50eko hobaria adineko pertsonen edota % 33ko edo hortik gorako minusbaliotasuna dutenen sarbide eta bizigarritasun baldintzak hobetzen dituzten barneko obretan. “Gure lanari esker, hobekuntza garrantzitsuak lortu dira zerga ordenantzetan, eta zuzeneko eragina izango dute herritarren poltsikoan”.
Onartutakoez gain, sozialistek zehaztu dute beste zuzenketa batzuen inpaktu ekonomikoa eta txertatze juridikoa aztertzeko konpromisoa bere egin duela udal gobernuak. “Zuzenketa horien artean, higiezinen birgaitze integrala egiteko, enpleguaren sorkuntza bultzatzeko, udalerrian enpresa eta saltoki berriak ezartzeko eta familia ugariek dituzten zerga-onurak guraso bakarreko familietara zabaltzeko helburua duten obretan EIOZaren hobariak handitzea azpimarra daiteke”, adierazi du Lezoko PSE-EEk: “Zuzenketen helburua da familia kalteberen babes soziala bermatzea eta Udalak ematen dituen zerbitzu publikoen kalitateari eutsiko dion eta kalitate hori hobetuko duen fiskalitate progresibo, bidezko eta berde bat lortzeko bidean aurrera egitea”.
Kontrara, Lezoko PSE-EEk aurreratu du udal gobernuaren asmoa dela udal tasa eta zergetan %2,6ko igoera orokorra ezartzea, eta zaborrenean %5ekoa. “Gure ustez, igoera hori ezin da justifikatu, herritar guztiak neurri berean hartzen baititu eraginpean, errenta maila edo egoera ekonomikoa edozein izanik ere. Gainera, egungo egoera hartu behar da kontuan, erosketa saskiko produktuen prezioek eta interes tasek igoera orokorrak izan baitituzte. Gogorarazi beharra dago, halaber, udalaren egoera ekonomiko-finantzarioa onbideratuta dagoela, ez dagoela zorpetuta eta diru sarreren zenbateko handia dagoela aurreikusita 2024. urterako”.
Herritar guztiei zerga karga igo ordez, “zerga ordenantzak aberastasuna zuzen banatzeko tresna bihurtzea” defendatuko dutela adierazi du Joxean Sanchez sozialisten eledunak, “dirua biltzeko grina alde batera utziz”. Udal gobernuari egindako kalkuluak berrikusteko eskatu, eta udalaren egoera ekonomiko ona herritarren ongizaterako baliatzeko eskatu dio EH Bilduren gobernu taldeari.
