Pirritx, Porrotx eta Marimototsen azkena, Juneren Hegoak elkartearen eskutik
'Ur-teak bete, abenturak bizi!' Pirritx, Porrotx eta Marimototsen azken lanarekin gozatzeko aukera izango da urriaren 21ean. Sarrerak, salgai bihartik.
Pirritx, porrotx eta Marimototxek azken lana eskainiko dute. Juneren Hegoak elkarteak urriaren 21ean ospatuko du egun handia, Juneren Hegoak jaia, eta horren barruan ekitaldi nagusietako bat izango den Pirritx, Porrotx eta Marimototx pailazoen emanaldiaren berri zabaldu du. Ur-teak bete, abenturak bizi! ikuskizunarekin gozatzeko aukera iznago dute beraz, txikienek.
Emanaldirako sarrerak bihar jarriko dituzte salgai, 12:00etan, 6 euroan. Erosteko, egin klik hemen.
Hamargarren urteurrena bete du aurten Juneren Hegoak elkarteak. Jakinarazi duenez, egun osoko jaia izango da urriaren 21ekoa, 11:00etan hasi eta 20:00ak arte. Egun horretarako prestatutakoen aurkezpena jaiaren aurreko astean egingo duela jakinarazi dute elkarteko kideek.
Juneren Hegoak elkartearen inspirazioa June Sanchez Tolaretxipi izan zen. 2013an hil zen haur minbiziak jota, bi urte zituela. Haren gurasoek eta lagun tald ebatek handik hilabete gutxira sortu zuten Juneren Hegoak elkartea. Ordutik, Araba, Bizkai eta Gipuzkoan ahultasun egoeran dauden eta gaixotasunak, aniztasun funtzionala edo adingabeen dolua bizitzen ari diren familiak laguntzeko sare bat sortu du elkarteak, eta egoera zaurgarri horietan diren familiei laguntzeko aukera batzuk eskaintzen ditu.
Eratu zutenetik, 59 familia artatu ditu Juneren Hegoak elkarteak, 118 boluntario pasa dira antolaketatik, 86 ekitaldi egin ditu, eta 287.000 eurotik gora bideratu ditu bere jarduerara. 2020an gainera, onura publikoko izaera aitortu zion Eusko Jaurlaritzak elkarteari.
Juneren Hegoak elkartea lagundu nahi dutenek hauetako bideren bat erabil dezakete: Boluntario egin nahi dutenei, posta elektroniko helbide honetara idazteko eskatu diete; hilero euro baten trukez Teamer izateko berriz, hemen sakatu. Dohaintza egiteko aukera ere badago (horretarako klik egin hemen). Juneren Hegoak elkartearen laguntzaile izateko aukera ere eskaintzen du elkarteak.
Horretaz gain, Sabadell banketxeko ES81 0081 4254 46 0001112822 kontu korrontean egin daiteke ekarpena, baita Bizum bidez ere 03930 kodea erabilita, edota dohaintzak sailean Juneren Hegoak bilatuta.
