Aranburu, Europako Trinketeko Eskuz Binakakoan garaile
EPLEko Taberna, Chiapuso, Yorel eta Ruben, nazioarteko txapelketetan aritu dira Euskal Selekzioarekin.
Chiapuso eta Taberna Mexikon jokatutako partidetako batean. Argazkia: Euskadiko Euskal Pilota Federazioa Garaipenaz garaipena dabil Antton Aranburu pilotaria. Trinketeko Eskuz Binakako Espainiako txapelketa irabazi zuen joan den ekainean Pradejon pilota elkarteko Garatearekin bikote eginda, eta asteburuan, berriz, Europako txapelketa irabazi du.
Ostiralean jokatu zuten finalaurrekoa Oloronen (Biarno) Santamaria eta Aranburuk osatutako bikotea, eta Frantziako Selekzioaren ordezkari jokatu zuten Gurrutxaga eta Mendiburu bikotea estu irabazi, 2-1. Larunbatean heldu zen Trinketeko Eskuz Binakako Europako txapelketaren finala. Aurrez aurre Espainiako selekzioaren ordezkari ziren bi bikote: Santamaria-aranburu eta Garatea-Luquin, eta garaipena lortu lehenengoek, 15-11 eta 15-12ko markagailuekin.
EPLEtik “oso positibotzat” jo dute Aranbururen garaipena, “urteak daramatza Trinkete modalitatean aurreratzen, eta honakoa garaipen handia da pilotariarentzat”.
Nazioartean Euskal Selekzioarekin
Bestalde EPLE Kirol Elkarteko Taberna, Chiapuso, Yorel eta Ruben abuztuan zehar Euskal Selekzioarekin batera aritu dira Mexikon eta Uruguain jokatutako txapelketetan. Taberna eta Chiapuso Trinketeko eskuz binakakoan aritu dira Mexiko Hiria eta inguruetan Ziarrusta eta Ugarte bikotearekin batera eta Mexikoko selekzioko hainbat pilotarirekin.
Txapelketari dagokionean, Tabernak lehen postua poltsikoratu zuen Einar Mundo pilotari mexikarrarekin jokatuta; Chiapusok, berriz, laugarren postua egin zuen txapelketan Kevin Moreno mexikarrarekin.
Txapelketan aritzeaz gain hainbat pilota eskolekin topaketak eta erakustaldiak ere egin dituzte pilotariek.
Larruzko Paletako Yorel eta Ruben Urugain izan dira abuztuan, Unda eta Arana bikotearekin batera, eta larruzko paleta zein pala motzeko hainbat erakustalditan hartu zuten parte. Trinidad hirian jokatutako Trinketeko larruzko Paletako Txapelketan parte hartu zuten EPLEko bi palistek. Laugarren sailkatu ziren EPLEkoak eta maila bikaina erakutsi zuten frontoian jokatu ordez, trinketean aritu baziren ere.
