Aste honetatik, Muittu Lezoren barruko kirol jarduerak abian
Ariketa fisikoa egiteko egitasmoetako batzuk jada hasi dira. Informazioa nahi duenak orientatzailearekin harremana egin dezake.
Martxan egitasmoan dabiltzanak asteartetan izango dira kiroldegian. Europako Kirol Astearekin batera, aste honetan bertan hasi dira edo hasiko dira Muittu Lezo estrategiaren barruko ikasturteko jarduera iraunkorrak. Ariketa fisikoaren bitartez osasuntsu izatea lezoar guztien esku geldituko da, beraz, kirol aukera horrekin.
Eskaintzaren barruko bi jarduera jada martxan dira: ostegunetako Tipi Topa ibilbideena, eta Lezoko Emakume Korrikalari taldearena, edo Martxan (beheko zerrendan jarduera guztien egun eta ordutegiak). Edonola ere, Kirol Orientazio Zerbitzua du udalak nahi duenak kontsulta dezan zein aukeraren alde egin nahi duen. Orientatzailearekin harremana egiteko bi modu daude: telefono deia egiten (674 17 16 81, Maddi) edo posta elektronikoa bidaliz.
Honakoak dira Muittu Lezoren barruan ikasturterako antolatutako jarduera orokorrak:
- Lezoko Emakume Korrikalariak. Astelehenero bilduko dira, 19:00etan, Koldobike Gezala pilotalekuan.
- Martxan. 60 urtetik gorakoek ariketa fisikoa egiteko jarduera. Asteartetan bilduko dira, 10:00etan, Bekoerrota kiroldegian.
- Lezoko Emakume Indartsuak. Emakumeek ariketa funtzionalak egiteko egitasmoa. Bekoerrota kiroldegian bilduko dira asteartero, 19:30ean.
- Nordic Walking. Ipar martxako jarduera, herritik zeharreko ibilbideekin. Asteazkenetan bilduko dira, 16:00etan, Koldobike Gezala pilotalekuan.
- Tipi Topa. Herritik zehar ibilbideak egiteko aukera, Gurutze Santuaren plazatik abiatuta. 10:45ean bide luzea egiten dutenak aterako dira, eta 11:00etan motzekoak. 12:00etan, indarrak hartzeko mokadutxoa plazan.
