Haur parkeak, txakur kakak, eta jabe arduragabeak
Patxiku Zelaiko haur parkean egunero azaltzen direla txakur kakak salatu dute. Halakoak egiten dituzten txakur jabeei arduraz eta errespetuz jokatzeko eskatu diete.
Txakur kakak Txirrita Parkeko haurren espazioan. Zenbatetan tokatzen da kaletik lurrera begira joan beharra zola azpian oparitxo desatseginik etxera ez eramateko. Zorionez, ez da txakur jabe guztien jarrera, baino batzuena behintzat bai, txakurrak kale erdian, izan espaloi, atari aurre, saltoki ondo… kaka egin eta jaso gabe uztea, abandonaturik, oharkabean hura zapaldu eta etxera eramango duen koitaduaren zain.
Udal ordenantza badago gaiaren gainekoa, baita isunak ere arduragabe jokatzen duten txakur jabe horientzat ere —ez direlako inondik inora ere guztiak arduragabe— ez dira, antza, nahikoa akuilu. Horren erakusle, ia egunero, Patxiku zelaiko haur parkea da. Asko dira bertara joaten diren haurrak jolasera, berezia baita. Udalak sustatutako parte hartze prozesuan haurrek beraiek diseinatu zuten euren neurrira parke hori. Goizetan berriz, besteren artean, Orereta Ikastolako Linoko eraikineko haurrek jotzen dute bertara jolastoki garaian.
“Zabor poltsa eta eskularrua gainean etortzen gara irakasleak, egunero dagoelako txakur kakaren bat jolas parkeko kulunka eta jolas elementuen erdian. Egunen batean zazpi ere jaso izan ditugu”, kexu da haurrekin parke horretara egunero gerturatzen den Idoia Elkano irakaslea.
Berehala etorri zaio ikasle bat: “Hemen beste bat da”. Belardi ertzera apuntatu dio, eta irakasleak hura ere jaso haurrek zapaldu aurretik.
Larriena, handik metro gutxira, berariaz txakurrentzat sortutako parkea dagoela da, “bertan dute lasai ibiltzeko eremua, haurrak txakur kaka zapaltzen ibili ez daitezen”. Egurrezko labirintoaren aurrealdeko hondar eremuan utzi du kaka multzoa txakur jabe batek, “ikusten duzunez, haurrek oinetakoak kendu egiten dituzte hemen hondarretan jolasten ibiltzeko batera eta bestera. Beraien espazioa da gainera, zergatik ezin dute lasai ibili inork euren jolasa eten gabe? Jolasean dauden bitartean ere etorri izan dira aske doazen txakurrak eta saltoka edota atzetik segika hasi, eta haur batzuk beldurtu egiten dira”.
Eskaera egin du irakasleak, “errespeta dezatela haur parkea. Ikaragarria da irakasleok eskularrua eta zabor poltsa ekarri behar izatea besteen txakurren kakak jasotzeko egun batean bai eta hurrengoan ere. Gainera zerbait esaten baduzu, jasotako erantzuna ikaragarria izaten da batzuetan. Kartela dago hemen, parke sarreran, haurren eremua dela, baino jabe batzuei bost axola”.
Eguneroko ogia dela egoera hori dio Elkanok Patxiku Zelaiko haur parkean. Ez luke behar bada zaila guztien eskubide eta espazioak errespetatuz elkarbizitzea.
