[Erreportajea] Hankak Gaintxurizketan, eta burua Los Angelesen
Junior Mailako Munduko Txapelketako zirkuituan parte hartzen ari da Harriet Portugal scooter kirolari lezoarra. Gaintxurizketan entrenatzen da, eta 2028ko Olinpiar Jokoak ditu amets.
Goi mailako beste kirolari bat du Lezok: Harriet Portugal. Scooter kirolaria da, eta egun 2023ko Scootering World Championships lehiaketan ari da, besteak beste. Txapelketa horretan munduko pistako scooter (patinete antzekoak dira) kirolari onenak ari dira selekzioka lehian, eta tartean da lezoarra, Junior Mailan. Ez nolanahi gainera: ekainean Madrilen egin zen lehen proban laugarren izan zen, eta irailaren 16-17 artean, Bartzelonakoan, garaile. Espainiako selekzioarekin ari da, hautatzaileek Portugalengan konfiantza osoa dutelako, baita aurrera begira ere: 2028ko Los Angelesko Olinpiar Jokoetan izango da lehenengoz olinpiko scooter modalitatea, eta bertarako kirolariak prestatzen ari dira. Horien artean da 15 urteko lezoarra. Gaintxurizketan entrenatzen da, baina Los Angelesen du burua gazteak. Hori bai. Txikitik hasi zuen bidea: Bekoerrota ondoko skate pista izan zuen bigarren (edo lehen) etxe, han ikasi zituen kirol urbano horren lehen lezioak, kalean, lagun artean.
Munduko onenen artean da. «Asko entrenatzen ari naiz, eta emaitzak iristen ari dira. Pozik nago egiten ari naizenarekin», aitortu du lezoarrak. Munduko lehiaketako lehen bi probak eginda, hurrengoak noiz izango diren zehazteko daudela adierazi du scooter park kirolariak. Baina berdin zaio. Entrenatzen jarraitzea da haren asmoa egunez egun hobetzen joateko. Ametsa, Los Angeles: «Zaila izango da han izatea. Entrenatzea da gakoa, egunero ikastea». Etxe ondoan du trebatzeko aukera, Gaintxurizketako Abendaño industrialdean dagoen Oarsoaldeko Muturreko Kirolak (OMK) Indoor-en pabiloian. «Astean lau-bostetan noa hara entrenatzera. Arratsalde osoa izaten naiz han. Pistan gora eta behera ibiltzeaz gain, forman egoteko bestelako ariketa fisikoak egiten ditut».
Baina euren kirolean irudimena ere behar da, sormena: epaileek birak, itzulipurdiak, mugimenduak eta horrelakoak ere puntuatzen dituzte; horiek lantzeko etxean ohe elastikoa du, eta OMK Indoor-en apar sintetikoko igerilekua. Scooter-a muturreko kirola izanik, Portugalek onartu du tokatu zaiola pistan tupustekoren bat edukitzea. Baina tira, kirol horren ikurretakoa da kolpeak jaso, eta berriz ere altxatzea. «Azken batean, horrelakoa da kirol hau. Kolpeak ere jasotzen dira. Baina horietatik ere ikasi egin behar da aurrera egiteko».
Harriet Portugal, Bartzelonako probako podiumaren gorenean.
Aurkariak eta familia
Jack Walsh estatubatuarra, eta Fantin Phabord frantziarra. Horiek dira Portugalen ustez dituen aurkaririk gogorrenak Scootering World Championships-en. Aurrerantzean ere, nahiz eta aurkari gehiago agertuko diren, horiek ikusten ditu kontrario nagusi txapelen, garaikurren, edo zergatik ez, domina olinpikoen borrokan. Errespetuz, baina izurik gabe hitz egiten du haietaz.
Baina aurtengo garaipenak ez dira kasualitatez iritsi. Iaz, Junior Mailako Europako txapeldun izan zen, aurten jada Euskal Herriko txapeldun izan da, eta azaroan du Espainiakoa. Etxeko apalak aurretik ere kopaz beteta dauzka, dozenaka izan direlako azken urteetan lortu dituen garaipenak. Hamabost urterekin badaki zer den goi-goian izatea.
Ez dago bakarrik. Senideak ondoan ditu beti laguntzen eta behar den tokietara eramaten. Entrenatzeko eremua etxe ondoan izatea ere abantaila da harentzat, goi mailako entrenamenduak egin ditzakeelako horretarako prestatua dagoen eremu batean. Ikasketekin ari da aldi berean lezoarra. «Maiz noa kanpora, baina galdutako eskola orduak errekuperatzen saiatzen naiz». 2028an Los Angelesera joateko baimena beharko du. Eta kirolari aroa bukatzean, jarraitzeko asmoa du: «Scooter entrenatzaile izan nahiko nuke aurrerago».
